వెంగళరావు పేట ఎస్సీ సెల్ గ్రామ కమిటీ ఎన్నిక

హైదరాబాద్: తెలంగాణ గురుకుల పాఠశాలలు, కళాశాలల్లో విద్యార్థుల భోజనానికి అవసరమైన కిరాణా సరుకుల సరఫరాలో జాప్యం జరుగుతోందని సిబ్బంది ఆందోళన వ్యక్తం చేస్తున్నారు. ఆగస్టు 25న అవసరమైన కిరాణా సరుకుల కోసం ఇండెంట్‌ సమర్పించినప్పటికీ సెప్టెంబర్‌ 30 నాటికి కూడా పలు గురుకులాలకు సరుకులు పూర్తిస్థాయిలో అందలేదని తెలంగాణ గురుకుల స్కూల్ మైనారిటీ అధ్యక్షుడు మహమ్మద్ రాజమ్మద్ తెలిపారు. గురుకులాలు రెసిడెన్షియల్‌ విద్యాసంస్థలు కావడంతో విద్యార్థులకు ప్రతిరోజూ అల్పాహారం, మధ్యాహ్నం భోజనం, రాత్రి భోజనం అందించాల్సి ఉంటుంది. ఇందుకోసం పప్పులు, వంట నూనె, చక్కెర, ఉప్పు, మసాలా దినుసులు తదితర నిత్యావసర సరుకులు నిరంతరం అందుబాటులో ఉండాలి. అయితే ఇండెంట్‌ సమర్పించి నెల రోజులు దాటినా సరుకులు అందకపోవడంతో అందుబాటులో ఉన్న పరిమిత స్టాక్‌తోనే రోజువారీ భోజన నిర్వహణ కొనసాగించాల్సి వస్తోందని సిబ్బంది చెబుతున్నారు. ముఖ్యంగా పప్పులు, నూనె, ఇతర నిత్యావసర వస్తువుల నిల్వలు తగ్గిపోతుండటంతో వంట నిర్వహణలో ఇబ్బందులు ఎదురవుతున్నాయని పేర్కొంటున్నారు.

సరఫరాలో జాప్యంపై స్పష్టత ఇవ్వాలి

గురుకులాలకు ప్రొవిజన్‌ సరఫరా బాధ్యతలు చేపట్టిన నేషనల్ ఫెడరేషన్ ఆఫ్ ఫార్మర్స్ ప్రొక్యూర్మెంట్,  ప్రాసెసింగ్ అండ్ రిటైలింగ్ కోపరేటివ్స్    ఆఫ్ ఇండియా లిమిటెడ్ నుంచి సరుకుల సరఫరాలో ఆలస్యం జరుగుతోందని సిబ్బంది పేర్కొంటున్నారు. సరఫరా ఎందుకు ఆలస్యమవుతోంది? పెండింగ్‌ ఇండెంట్లను ఎప్పుడు పూర్తి చేస్తారు? అనే అంశాలపై సంబంధిత అధికారులు స్పష్టత ఇవ్వాలని వారు కోరుతున్నారు. కిరాణా సరుకుల కొరత విషయాన్ని సంబంధిత అధికారులు, ఉన్నతాధికారుల దృష్టికి తీసుకెళ్లినా ఇప్పటివరకు పూర్తిస్థాయిలో సరఫరా జరగలేదని సిబ్బంది చెబుతున్నారు. రోజువారీ భోజన నిర్వహణలో ఎలాంటి అంతరాయం తలెత్తకుండా తక్షణ ప్రత్యామ్నాయ చర్యలు చేపట్టాలని కోరుతున్నారు.

సరుకులు చేరే వరకు పర్యవేక్షణ అవసరం

విద్యార్థుల భోజనానికి సంబంధించిన అంశం కావడంతో సరఫరా వ్యవస్థపై అధికారులు ప్రత్యేక దృష్టి పెట్టాలని మహమ్మద్ రాజమ్మద్ అన్నారు. కేవలం ఇండెంట్‌ స్వీకరించడంతో ప్రక్రియ ముగియకుండా, సరుకులు వాస్తవంగా సంబంధిత గురుకులానికి చేరే వరకు సరఫరాను పర్యవేక్షించే విధానం ఉండాలని సూచించారు.

పెండింగ్‌ ఇండెంట్లపై సమగ్ర నివేదికకు డిమాండ్‌

రాష్ట్రవ్యాప్తంగా గురుకుల పాఠశాలలు,కళాశాలల వారీగా పెండింగ్‌లో ఉన్న ఇండెంట్లు, ప్రస్తుతం అందుబాటులో ఉన్న స్టాక్‌, అవసరమైన పరిమాణం, సరఫరా చేసిన తేదీ, ఇంకా సరఫరా చేయాల్సిన సరుకుల వివరాలతో సమగ్ర నివేదిక రూపొందించాలని మహమ్మద్ రాజమ్మద్ కోరారు. స్టాక్‌ అత్యల్పంగా ఉన్న గురుకులాలను వెంటనే గుర్తించి అత్యవసర ప్రాతిపదికన సరుకులు అందించాలని, అవసరమైతే తాత్కాలిక ప్రత్యామ్నాయ సరఫరా వ్యవస్థను ఏర్పాటు చేయాలని విజ్ఞప్తి చేశారు. విద్యార్థుల భోజన నిర్వహణలో సరుకుల కొరత వల్ల ఎలాంటి ఇబ్బందులు తలెత్తకుండా ప్రభుత్వం, సంబంధిత శాఖ ఉన్నతాధికారులు వెంటనే స్పందించి పెండింగ్‌ ఇండెంట్లను క్లియర్‌ చేయాలని మహమ్మద్ రాజమ్మద్ కోరారు. భవిష్యత్తులో ఇలాంటి సమస్యలు పునరావృతం కాకుండా ముందస్తు ప్రణాళికతో తగిన బఫర్‌ స్టాక్‌ నిర్వహించి, నిరంతర సరఫరా ఉండేలా చర్యలు తీసుకోవాలని విజ్ఞప్తి చేశారు.