ఉపాధి కాపాడాలి.. ఫ్యాక్టరీ ఉత్పత్తులు పునరుద్ధరించాలి

చౌటకూర్ : చౌటకూర్ మండలం శివంపేట మండలంలోని బీర్ ఫ్యాక్టరీలో గత వారం రోజులుగా ఉత్పత్తులు నిలిచిపోవడంతో వందలాది మంది కాంట్రాక్ట్ కార్మికులు ఉపాధి కోల్పోయే పరిస్థితి ఏర్పడిందని పేర్కొంటూ, కార్మికుల జీవనోపాధిని పరిరక్షించాలని కోరుతూ సిఐటియు ఆధ్వర్యంలో సోమవారం జిల్లా కలెక్టర్‌కు వినతిపత్రం ఇవ్వడం జరిగింది.కంపెనీపై వచ్చిన కాలుష్య ఆరోపణలపై సంబంధిత అధికారులు నిష్పక్షపాతంగా విచారణ చేపట్టి, పొల్యూషన్ కంట్రోల్ బోర్డు నివేదికను వెంటనే విడుదల చేయాలని డిమాండ్ చేశారు.కాలుష్యం జరిగినట్లు శాస్త్రీయంగా నిరూపితమైతే చట్టప్రకారం చర్యలు తీసుకోవాలని, కానీ వాస్తవాలు తేలకముందే పరిశ్రమ ఉత్పత్తులను నిలిపివేయడం వల్ల వందలాది మంది కార్మికులు, వారి కుటుంబాలు తీవ్ర ఆర్థిక ఇబ్బందులు ఎదుర్కొంటున్నాయని పేర్కొన్నారు. కార్మికుల ఉపాధికి ఎలాంటి భంగం కలగకుండా ప్రభుత్వం, జిల్లా యంత్రాంగం, కాలుష్య నియంత్రణ మండలి అధికారులు తక్షణ చర్యలు తీసుకోవాలని కోరారు. కాంట్రాక్ట్ కార్మికులకు రెగ్యులర్ డ్యూటీలు, ఉద్యోగ భద్రత, తగిన పని దినాలు కల్పించాలని, పరిశ్రమను పూర్తి స్థాయిలో తిరిగి ప్రారంభించేలా ప్రభుత్వం, కంపెనీ యాజమాన్యం చర్యలు చేపట్టాలని విజ్ఞప్తి చేశారు. శివంపేట ప్రాంత ప్రజల ఉపాధికి ఈ పరిశ్రమ కీలకమని, పర్యావరణ పరిరక్షణతో పాటు కార్మికుల జీవనోపాధికి కూడా సమాన న్యాయం చేయాలని కోరారు.ఈ కార్యక్రమంలో సిఐటియు జిల్లా అధ్యక్షులు బీరం మల్లేశం, ఉపాధ్యక్షులు పి బాగారెడ్డి, నాయకులు, ప్రసన్న రావు, సురేష్, మల్లారెడ్డి, లక్ష్మారెడ్డి చంద్రయ్య శీను యశోద సుమిత్ర రాములు విట్టల్ మరియు కాంట్రాక్ట్ కార్మికులు పాల్గొన్నారు.