శివంపేట అభివృద్ధికి రూ.1.53 కోట్ల నిధులు

చౌటకూర్‌,  : చౌటకూర్‌ మండల పరిధిలోని శివంపేట గ్రామ అభివృద్ధికి ప్రభుత్వం రూ.1.53 కోట్ల నిధులు మంజూరు చేసింది. రాష్ట్ర ఆరోగ్యశాఖ మంత్రి దామోదర్‌ రాజనర్సింహ చొరవతో మంజూరైన ఈ నిధులతో గ్రామంలో కీలక మౌలిక వసతుల పనులు చేపట్టనున్నారు. ప్రధానంగా రహదారుల అభివృద్ధితో పాటు రాత్రివేళల్లో ప్రజలకు మెరుగైన వెలుతురు సౌకర్యం కల్పించేందుకు చర్యలు తీసుకోనున్నారు.
రూ.1.43 కోట్లతో సీసీ రోడ్లు
మంజూరైన నిధుల్లో రూ.1.43 కోట్లను ప్రధాన రహదారుల అభివృద్ధికి కేటాయించారు. ఇందులో భాగంగా అంబేద్కర్‌ విగ్రహం నుంచి కుమ్మరివాడ వరకు, హనుమాన్‌ దేవాలయం నుంచి చర్చి వరకు ఉన్న రహదారులను సీసీ రోడ్లుగా అభివృద్ధి చేయనున్నారు. దీంతో ఆయా ప్రాంతాల్లో రాకపోకలు సులభతరం కావడంతో పాటు వర్షాకాలంలో రహదారులపై ఏర్పడే ఇబ్బందులు తగ్గనున్నాయి.
రూ.10 లక్షలతో హైమాస్ట్‌ లైట్లు
గ్రామంలోని ప్రధాన కూడళ్లలో ప్రజలకు మెరుగైన వెలుతురు అందించేందుకు రూ.10 లక్షలతో హైమాస్ట్‌ లైట్లు ఏర్పాటు చేయనున్నారు. దీంతో రాత్రివేళల్లో రాకపోకలు సాగించే ప్రజలకు ఇబ్బందులు తగ్గడంతో పాటు ప్రధాన ప్రాంతాల్లో వెలుతురు సౌకర్యం మెరుగుపడనుంది.
ఇప్పటికే అభివృద్ధి పనులు
శివంపేటలో గత కొంతకాలంగా పలు అభివృద్ధి పనులు కొనసాగుతున్నాయి. హెచ్‌ఎండీఏ నిధులతో 250 మీటర్ల సీసీ రోడ్డు నిర్మాణంతో పాటు 450 మీటర్ల అండర్‌ డ్రైనేజీ పనులు పూర్తయ్యాయి. గ్రామ పంచాయతీ సొంత నిధులతో సుమారు కిలోమీటరు మేర అండర్‌ డ్రైనేజీ పనులు కూడా చేపట్టి పూర్తి చేశారు.అండర్‌ డ్రైనేజీ పనులతో మురుగునీటి సమస్యకు కొంతమేర పరిష్కారం లభించడంతో పాటు గ్రామంలో పారిశుధ్య పరిస్థితులు మెరుగుపడుతున్నాయి. ఇప్పటికే చేపట్టిన పనులకు కొనసాగింపుగా తాజాగా రూ.1.53 కోట్ల నిధులు మంజూరు కావడంతో గ్రామంలో అభివృద్ధి పనులు మరింత వేగం పుంజుకోనున్నాయి.
మంత్రికి సర్పంచ్‌ కృతజ్ఞతలు
శివంపేట గ్రామ అభివృద్ధికి నిధులు మంజూరు చేసిన రాష్ట్ర ఆరోగ్యశాఖ మంత్రి దామోదర్‌ రాజనర్సింహకు గ్రామ సర్పంచ్‌ సంధ్యారాణి మల్లికార్జున్‌గౌడ్‌ కృతజ్ఞతలు తెలిపారు. గ్రామంలో అవసరమైన మౌలిక వసతుల కల్పన కోసం కోరిన వెంటనే నిధులు మంజూరు చేయడం పట్ల ఆమె ధన్యవాదాలు తెలిపారు.తాజా నిధులతో ప్రధాన రహదారుల అభివృద్ధి, హైమాస్ట్‌ లైట్ల ఏర్పాటు వంటి పనులు చేపట్టనున్నట్లు సర్పంచ్‌ పేర్కొన్నారు. హెచ్‌ఎండీఏ, గ్రామ పంచాయతీ నిధులతో ఇప్పటికే పలు అభివృద్ధి పనులు పూర్తి చేశామని, ప్రస్తుతం మంజూరైన నిధులతో మరిన్ని మౌలిక వసతులు కల్పించనున్నట్లు తెలిపారు.
గ్రామస్తుల్లో హర్షం
శివంపేటకు భారీగా నిధులు మంజూరు కావడం, ప్రధాన రహదారుల అభివృద్ధి, హైమాస్ట్‌ లైట్ల ఏర్పాటు చేయనుండటంపై గ్రామస్తులు హర్షం వ్యక్తం చేస్తున్నారు. రహదారుల పనులు పూర్తయితే గ్రామంలోని పలు ప్రాంతాలకు రాకపోకలు మరింత సులభతరం కానున్నాయని వారు పేర్కొన్నారు. రహదారులు, అండర్‌ డ్రైనేజీ, విద్యుత్‌ వెలుతురు వంటి మౌలిక వసతుల అభివృద్ధితో శివంపేట మరింత ప్రగతి సాధించనుందని గ్రామస్తులు ఆశాభావం వ్యక్తం చేస్తున్నారు.