420 అడుగుల ఫ్లెక్సీతో బీఆర్‌ఎస్‌ నిరసన

బెల్లంపల్లి, మంచిర్యాల జిల్లా : ఎన్నికల సమయంలో కాంగ్రెస్‌ పార్టీ ఇచ్చిన హామీలను ప్రభుత్వం పూర్తిస్థాయిలో అమలు చేయడంలో విఫలమైందని ఆరోపిస్తూ బీఆర్‌ఎస్‌ ఆధ్వర్యంలో బెల్లంపల్లిలో బుధవారం నిరసన కార్యక్రమం నిర్వహించారు. మాజీ ఎమ్మెల్యే దుర్గం చిన్నయ్య ఆధ్వర్యంలో పట్టణంలోని అంబేద్కర్‌ చౌరస్తాలో చేపట్టిన ఈ ఆందోళనకు సుమారు వెయ్యి మంది హాజరయ్యారు. ఈ సందర్భంగా 420 అడుగుల పొడవైన ఫ్లెక్సీని ప్రదర్శిస్తూ కాంగ్రెస్‌ ప్రభుత్వ తీరును నిరసించారు. ఎన్నికల సమయంలో ప్రజలకు ఇచ్చిన హామీలను అమలు చేయాలని, అమలు చేసిన హామీలు.. పెండింగ్‌లో ఉన్న హామీల వివరాలను ప్రజలకు స్పష్టంగా వెల్లడించాలని బీఆర్‌ఎస్‌ నాయకులు డిమాండ్‌ చేశారు. హామీల అమలుకు ప్రభుత్వం స్పష్టమైన గడువులు ప్రకటించాలని వారు కోరారు. రైతులు, మహిళలు, యువత, నిరుద్యోగులు, పేదలు తదితర వర్గాలకు ఇచ్చిన హామీలపై ప్రభుత్వం సమాధానం చెప్పాలని నినాదాలు చేశారు. కేవలం హామీలు ప్రకటించడం కాకుండా వాటి అమలుకు కార్యాచరణ, గడువులను వెల్లడించాలని డిమాండ్‌ చేశారు.మాజీ ఎమ్మెల్యే దుర్గం చిన్నయ్య మాట్లాడుతూ.. ఎన్నికల సమయంలో ఇచ్చిన హామీలను ప్రజలు నమ్మి కాంగ్రెస్‌కు అవకాశం కల్పించారని, వాటి అమలుపై ప్రభుత్వం ప్రజలకు జవాబుదారీగా ఉండాలని అన్నారు. ప్రతి హామీపై ప్రభుత్వం స్పష్టమైన ప్రకటన చేయాలని, అమలు చేయని హామీలకు గడువులు ప్రకటించాలని డిమాండ్‌ చేశారు.కార్యక్రమంలో బీఆర్‌ఎస్‌ నాయకులు, కార్యకర్తలు, అభిమానులు, ప్రజలు పెద్ద సంఖ్యలో పాల్గొన్నారు.