80ల జ్ఞాపకాల్లోకి మళ్లీ ప్రయాణం.. ఏఐతో వింటేజ్ ఫొటో ట్రెండ్ వైరల్!

రాజన్న సిరిసిల్ల / ఎల్లారెడ్డిపేట : 1980ల నాటి జ్ఞాపకాలను మరోసారి కళ్లముందుకు తీసుకొస్తున్న వింటేజ్ ఫొటో ట్రెండ్ ప్రస్తుతం సోషల్ మీడియాలో వైరల్‌గా మారింది. ఆర్టిఫిషియల్ ఇంటెలిజెన్స్ (ఏఐ) సాయంతో ప్రస్తుత ఫొటోలను 1980ల నాటి రూపంలోకి మార్చుకునే ట్రెండ్‌కు ఇన్‌స్టాగ్రామ్‌, ఫేస్‌బుక్‌ వంటి సామాజిక మాధ్యమాల్లో విశేష ఆదరణ లభిస్తోంది. సెలబ్రిటీల నుంచి సామాన్యుల వరకు ఎంతోమంది ఈ ట్రెండ్‌ను ప్రయత్నిస్తూ తమ రిట్రో ఫొటోలను సోషల్ మీడియాలో షేర్ చేస్తున్నారు. నాటి డ్రెస్సులు, మేకప్‌, హెయిర్‌స్టైల్స్‌, వాచ్‌లు, ఆభరణాలు, పాతకాలపు బ్యాక్‌గ్రౌండ్స్‌తో ఫొటోలకు ఏఐ సరికొత్త వింటేజ్ టచ్ ఇస్తోంది.

భారతీయ స్టైల్‌కు ప్రత్యేక ఆకర్షణ

1980ల భారతీయ వాతావరణాన్ని ప్రతిబింబించేలా మహిళలకు రంగురంగుల చీరలు, కర్లీ హెయిర్‌స్టైల్స్‌, పెద్ద ఆభరణాలు, పురుషులకు లూజ్ షర్టులు, హై-వేస్ట్ ట్రౌజర్లు, పెద్ద మీసాలు వంటి అంశాలను ఏఐ ఫొటోల్లో జోడిస్తున్నారు. దీంతో నాటి సినిమాలు, కుటుంబ ఆల్బమ్‌లు, స్టూడియో ఫొటోల జ్ఞాపకాలు మళ్లీ సజీవంగా కనిపిస్తున్నాయి. ఫిల్టర్ కాదు.. ఏకంగా 80ల కాలంలోకి! సాధారణ సెల్ఫీకి ఫిల్టర్‌ వేయడం కంటే, ఫొటోను చూస్తే నిజంగానే 1980ల కాలంలో తీసిన చిత్రంలా అనిపించేలా మార్చడమే ఈ ట్రెండ్ ప్రత్యేకత. ఫిల్మ్ గ్రెయిన్‌, సాఫ్ట్ ఫోకస్‌, పాత కెమెరా నాణ్యత, వెచ్చని లైటింగ్ వంటి అంశాలతో ఏఐ ఫొటోలను మరింత సహజంగా రూపొందిస్తోంది. కొత్త సాంకేతికతతో పాత జ్ఞాపకాలను కలిపిన ఈ వింటేజ్ ట్రెండ్ యువతను మాత్రమే కాకుండా 80ల కాలాన్ని చూసిన వారినీ ఆకట్టుకుంటోంది. దీంతో సోషల్ మీడియాలో “మళ్లీ 80ల్లోకి వెళ్దాం” అనే తరహాలో రిట్రో ఫొటోలకు క్రేజ్ రోజురోజుకూ పెరుగుతోంది.