ములుగు : ములుగు జిల్లా కేంద్రంలోని ఏరియా ఆసుపత్రి మరోసారి వైద్య సేవల నాణ్యతపై చర్చకు దారితీసింది. మల్లంపల్లి మండల కోడిశెలకుంట గ్రామపంచాయతీ పరిధిలోని మాన్సింగ్ తండాకు చెందిన బాదావత్ సంగీత అక్టోబర్ 16న ప్రసవం కోసం ఈ ఆసుపత్రిలో చేరగా, పెద్ద ఆపరేషన్ అనంతరం పాపకు జన్మనిచ్చింది. సాధారణంగా సురక్షిత వాతావరణంలో ప్రసవం జరిగిందని భావించిన కుటుంబ సభ్యులు అక్టోబర్ 20న ఆమెను డిశ్చార్జ్ చేసుకున్నారు. అయితే డిశ్చార్జ్ అనంతరం గాయం మానకపోవడం, కుట్లు తెరుచుకోవడం, దుర్వాసనతో కూడిన వ్యర్థ పదార్థం బయటకు రావడం వంటి సమస్యలు ఒక్కొకటిగా బయటపడటంతో కుటుంబం తీవ్ర ఆందోళనకు గురైంది.
చివరకు హుటాహుటిన హనుమకొండలోని ప్రైవేట్ ఆసుపత్రికి తరలించారు. అక్కడ వైద్యులు గాయం తీవ్ర స్థాయిలో ఉందని సూచించడంతో కేసు జాగ్రత్తగా నిర్వహించాల్సిన పరిస్థితి ఏర్పడింది. ఈ పరిణామం కుటుంబాన్ని మాత్రమే కాదు, స్థానికులనూ కదిలించింది. బాధిత కుటుంబ సభ్యులు మాట్లాడుతు.. ప్రభుత్వ పథకాలు అందుకోవడమే కాక, పెద్ద ఆసుపత్రిలో మంచి సేవలు లభిస్తాయనే ఆశతో ములుగు ఏరియా ఆసుపత్రిని ఎంచుకున్నాం. కానీ చికిత్సలో నిర్లక్ష్యం స్పష్టంగా కనిపించింది. ఇది పేదల ప్రాణాలకు ప్రమాదం కలిగించే వ్యవహారం” అని ఆరోపించారు. ఈ ఘటనపై స్థానిక ప్రజల్లో అసంతృప్తి పెరుగుతోంది. ఏరియా ఆసుపత్రిలో సకాలంలో వైద్యసిబ్బంది అందుబాటులో లేకపోవడం, పరికరాల కొరత, కేసులపై సరైన పర్యవేక్షణ లేకపోవడం తరచూ వినిపించే ఫిర్యాదులు. వైద్య సేవలు మెరుగుపరచాల్సిన అవసరం ఉన్న ఈ ఆసుపత్రి నిర్లక్ష్యంతో ప్రజలు ప్రైవేట్ ఆసుపత్రులపై ఆధారపడాల్సి వస్తోందని వారు తీవ్ర ఆవేదన వ్యక్తం చేస్తున్నారు. ఆరోగ్య హక్కు ప్రతి పౌరుడికీ మౌలికమైనదని గుర్తుచేస్తూ, పేదలు ఆధారపడే ఏరియా ఆసుపత్రిలో ఇలాంటి లోపాలు జరిగినప్పుడు ప్రభుత్వం తక్షణమే విచారణ జరిపి, బాధ్యులపై చర్యలు తీసుకోవాలని ప్రజలు కోరుతున్నారు. ప్రజా ఆరోగ్య సేవలపట్ల ప్రభుత్వ నిబద్ధతను పరీక్షించే ఘటనగా ఇది నిలిచిందని స్థానికులు భావిస్తున్నారు.
About The Author
.jpg)
