కుత్బుల్లాపూర్ జోన్‌కు కొత్త జోనల్ కమిషనర్

కుత్బుల్లాపూర్  : సాధారణ బదిలీల్లో భాగంగా ప్రభుత్వం కీలక పరిపాలనా మార్పులు చేపట్టింది. ఇందులో భాగంగా (సిఎంసి) కుత్బుల్లాపూర్ జోన్ జోనల్ కమిషనర్‌గా విధులు నిర్వహిస్తున్న సందీప్ కుమార్ జాను జనగామ జిల్లా కలెక్టర్‌గా నియమిస్తూ ఉత్తర్వులు జారీ చేసింది. కుత్బుల్లాపూర్ జోన్‌లో పరిపాలనా పటిష్టత, అభివృద్ధి కార్యక్రమాల వేగవంతం, ప్రజా సమస్యల పరిష్కారంలో సందీప్ కుమార్ జా తనదైన ముద్ర వేశారు. ముఖ్యంగా మౌలిక వసతుల అభివృద్ధి, పారిశుధ్య నిర్వహణ, పట్టణ ప్రణాళిక అంశాల్లో ఆయన చురుకైన చర్యలు చేపట్టారు. ఇప్పుడు ఆయనకు జనగామ జిల్లా కలెక్టర్‌గా బాధ్యతలు అప్పగించడం పరిపాలనా వర్గాల్లో ప్రాధాన్యత సంతరించుకుంది. ఇదే సమయంలో, జనగామ జిల్లా అదనపు కలెక్టర్‌గా పనిచేస్తున్న పర్మర్ పింకేష్ కుమార్ లలిత్ కుమార్‌ను కుత్బుల్లాపూర్ జోన్ నూతన జోనల్ కమిషనర్‌గా నియమిస్తూ ప్రభుత్వం ఉత్తర్వులు జారీ చేసింది. అనుభవం కలిగిన పరిపాలనా అధికారి అయిన పర్మర్ పింకేష్ కుమార్ లలిత్ కుమార్ బాధ్యతలు స్వీకరించిన తర్వాత జోన్ అభివృద్ధి కార్యక్రమాలకు మరింత ఊపు వస్తుందని అధికారులు, ప్రజాప్రతినిధులు ఆశాభావం వ్యక్తం చేస్తున్నారు. కొత్త జోనల్ కమిషనర్ త్వరలోనే బాధ్యతలు స్వీకరించి, ప్రస్తుత ప్రాజెక్టులపై సమీక్ష నిర్వహించనున్నట్లు సమాచారం. కుత్బుల్లాపూర్ జోన్‌లో పెండింగ్ సమస్యలు, అభివృద్ధి పనుల వేగవంతంపై ఆయన ప్రత్యేక దృష్టి సారించనున్నారని తెలుస్తోంది. ఈ పరిపాలనా మార్పులు కుత్బుల్లాపూర్ జోన్ అభివృద్ధికి దోహదపడతాయని స్థానిక వర్గాలు భావిస్తున్నాయి.