సింగరేణికి రూ.55 వేల కోట్ల బకాయిలు చెల్లించాలి: బీజేపీ డిమాండ్

నస్పూర్ (మంచిర్యాల): రాష్ట్ర ప్రభుత్వం సింగరేణి సంస్థకు చెల్లించాల్సిన రూ.55 వేల కోట్ల బకాయిలను వెంటనే విడుదల చేయాలని డిమాండ్ చేస్తూ బుధవారం (30.09.2026) నస్పూర్ సీసీసీ కార్నర్ వద్ద బీజేపీ ఆధ్వర్యంలో "సింగరేణి బకాయి - బీజేపీ లడాయి" పేరిట భారీ ధర్నా నిర్వహించనున్నారు. ఈ ధర్నా ఏర్పాట్లను బీజేపీ రాష్ట్ర ఉపాధ్యక్షులు రఘునాథ్ వెరబెల్లి, జిల్లా అధ్యక్షుడు నగునూరి వెంకటేశ్వర్ గౌడ్ మంగళవారం పరిశీలించారు. ఈ సందర్భంగా రఘునాథ్ మాట్లాడుతూ.. ప్రభుత్వం నిధులు విడుదల చేయకపోవడంతో సింగరేణి మనుగడ ప్రశ్నార్థకంగా మారిందని, కొత్త గనుల ఏర్పాటుతో పాటు కార్మికులకు కనీస భద్రతా పరికరాలైన బూట్లు, టోపీలు కొనుగోలు చేయలేని దుస్థితి నెలకొందని మండిపడ్డారు. రేపు ఉదయం జరగనున్న ఈ ధర్నాకు ముఖ్య అతిథులు గా మల్కాజ్‌గిరి ఎంపీ ఈటెల రాజేందర్, ఆదిలాబాద్ ఎంపీ గోడెం నగేష్, బీజేపీ ఎమ్మెల్యేలు హాజరవుతారని తెలిపారు. కార్మికులు పెద్ద సంఖ్యలో తరలివచ్చి నిరసనను విజయవంతం చేయాలని పిలుపునిచ్చారు. ఈ కార్యక్రమంలో బీజేపీ నాయకులు సత్రం రమేష్, కుర్రే చక్రవర్తి, వంగపల్లి వెంకటేశ్వర్ రావు, కమలం రావు, బేరా సత్యనారాయణ, కమలాకర్ రావు, పొన్నవేణి సదయ్య, మల్కా రాజేశం, బుద్దే రవి, బద్రి శ్రీకాంత్, బూర్ల చిరంజీవి, కొండ వెంకటేష్ తదితరులు పాల్గొన్నారు.