విద్యా హబ్ గా స్టేషన్ ఘన్‌పూర్

స్టేషన్ ఘన్‌పూర్, (జనగామ): స్టేషన్ ఘన్‌పూర్ నియోజకవర్గాన్ని ఉన్నత ప్రమాణాలతో కూడిన విద్యా హబ్ గా తీర్చిదిద్దుతానని మాజీ ఉప ముఖ్యమంత్రి, ఎమ్మెల్యే కడియం శ్రీహరి అన్నారు. స్టేషన్ ఘన్‌పూర్ నియోజకవర్గ కేంద్రంలో డిగ్రీ కళాశాల నిర్మాణానికి ఐదు ఎకరాల భూమి కేటాయించినందుకు రాష్ట్ర ఎస్సీ, ఎస్టీ, మైనారిటీ సంక్షేమ శాఖ మంత్రి అడ్లూరి లక్ష్మణ్ కు కృతజ్ఞతలు తెలిపారు. నియోజకవర్గ కేంద్రంలోని సాంఘిక సంక్షేమ గురుకుల పాఠశాల ఆవరణలో డిగ్రీ కళాశాల నిర్మాణానికి ఐదు ఎకరాల భూమిని కేటాయిస్తూ సంబంధిత అలాట్ మెంట్ కాపీని శుక్రవారం ఎమ్మెల్యే కడియం శ్రీహరికి అందజేశారు. ఈ సందర్బంగా ఎమ్మెల్యే మాట్లాడుతూ ఎన్నో ఏళ్లుగా ఎదురు చూస్తున్న డిగ్రీ కళాశాల నిర్మాణానికి మార్గం సుగమం అయిందని అన్నారు. ముఖ్యమంత్రి రేవంత్ రెడ్డి, మంత్రి లక్ష్మణ్ కు నియోజకవర్గ ప్రజలు ఎల్లప్పుడూ ఋణపడి ఉంటారని తెలిపారు. నిరుపేద విద్యార్థులకు నాణ్యమైన విద్యను అందించాలనే లక్ష్యంతో గురుకులాలు, కస్తూరిభా గాంధీ పాఠశాలలు, మాడల్ స్కూళ్లు, యంగ్ ఇండియా ఇంటిగ్రేటెడ్ రెసిడెన్షియల్ పాఠశాల, తెలంగాణ పబ్లిక్ స్కూల్తో పాటు డిగ్రీ కళాశాల కూడా అతి త్వరలోనే స్వంత భవనంలో అందుబాటులోకి రానున్నట్లు వెల్లడించారు. విద్యార్థులకు ఉన్నత ప్రమాణాలతో కూడిన విద్యను అందించడంతో పాటు రానున్న రోజులల్లో నియోజకవర్గాన్ని విద్యా హబ్ తీర్చిదిద్దుతానని కడియం తెలిపారు.