హైకమాండ్ నిర్ణయం తర్వాత కొండా సురేఖ కార్యాచరణపై ఉత్కంఠ 

 హైదరాబాద్: మంత్రి కొండా సురేఖ వ్యవహారంలో కాంగ్రెస్‌ అధిష్ఠానం ఎలాంటి నిర్ణయం తీసుకుంటుందన్న దానిపై రాజకీయ వర్గాల్లో ఉత్కంఠ కొనసాగుతోంది. తన కుమార్తె స్వతంత్రంగా చేసిన వ్యాఖ్యలకు తనను బాధ్యురాలిని చేయడం సరికాదనే అభిప్రాయంతో కొండా సురేఖ ఉన్నట్లు సమాచారం. ఈ అంశంపై ఏఐసీసీ పెద్దలు తన వాదనను పరిగణనలోకి తీసుకుని తనకు న్యాయం చేస్తారనే నమ్మకంతో ఆమె ఉన్నట్లు పార్టీ వర్గాల్లో చర్చ జరుగుతోంది. ఇదిలా ఉండగా, అధిష్ఠానం నుంచి వచ్చే నిర్ణయాన్ని బట్టి తదుపరి కార్యాచరణపై కొండా దంపతులు ఒక స్పష్టమైన నిర్ణయానికి వచ్చే అవకాశం ఉందని తెలుస్తోంది. ఒకవేళ పార్టీ హైకమాండ్‌ మంత్రి పదవికి రాజీనామా చేయాలని లేదా క్రమశిక్షణ చర్యల్లో భాగంగా సస్పెన్షన్‌ విధించాలని ఆదేశిస్తే, కేవలం మంత్రి పదవితోనే కాకుండా శాసనసభ సభ్యత్వానికి కూడా రాజీనామా చేసే అంశాన్ని కొండా సురేఖ పరిశీలించే అవకాశం ఉందనే ప్రచారం జరుగుతోంది.అయితే అధిష్ఠానం తుది నిర్ణయం తీసుకునే వరకు ఈ అంశంపై బహిరంగంగా ఎలాంటి వ్యాఖ్యలు చేయకూడదని కొండా సురేఖ, కొండా మురళి భావిస్తున్నట్లు సమాచారం. పార్టీ నాయకత్వంతో నేరుగా చర్చించి తమ వైఖరిని వివరించిన తర్వాతే తదుపరి అడుగు వేయాలని వారు నిర్ణయించుకున్నట్లు తెలుస్తోంది.మరోవైపు, ఈ వ్యవహారం కాంగ్రెస్‌ పార్టీ అంతర్గత రాజకీయాల్లో చర్చనీయాంశంగా మారింది. పార్టీ క్రమశిక్షణ, నాయకుల వ్యాఖ్యలు, కుటుంబ సభ్యుల రాజకీయ ప్రకటనలకు పార్టీ నేతలను బాధ్యులను చేయాలా? అనే అంశాలపై కూడా చర్చ సాగుతోంది. కొండా సురేఖ విషయంలో అధిష్ఠానం తీసుకునే నిర్ణయం పార్టీపై, తెలంగాణ కాంగ్రెస్‌ రాజకీయ సమీకరణాలపై ఎలాంటి ప్రభావం చూపుతుందన్నది ఆసక్తికరంగా మారింది. ప్రస్తుతం అందరి దృష్టి ఏఐసీసీ నిర్ణయంపైనే ఉంది. హైకమాండ్‌ నుంచి స్పష్టమైన ఆదేశాలు వచ్చిన తర్వాతే కొండా సురేఖ తదుపరి రాజకీయ కార్యాచరణపై అధికారికంగా స్పందించే అవకాశం ఉందని పార్టీ వర్గాలు భావిస్తున్నాయి.