బద్రిగూడెం గ్రామసభలో వివాదం

చౌటకూర్ : సంగారెడ్డి జిల్లా చౌటకూర్ మండల పరిధిలోని బద్రిగూడెం గ్రామ పంచాయతీ జనరల్ బాడీ సమావేశంలో గ్రామ పంచాయతీ నిధుల ఖర్చుల వివరాలపై చర్చ జరుగుతున్న సమయంలో వివాదం చోటుచేసుకున్నట్లు వార్డు సభ్యుడు చింత ఆంజనేయులు ఆరోపించారు. గ్రామ పంచాయతీ నిధులకు సంబంధించిన లెక్కలు అడిగిన సందర్భంలో సర్పంచ్ తండ్రి బైరు యాదయ్య తనతో దురుసుగా ప్రవర్తించి, చొక్కా కాలర్ పట్టుకుని బెదిరించారని ఆయన పేర్కొన్నారు.వార్డు సభ్యుడు చింత ఆంజనేయులు తెలిపిన వివరాల ప్రకారం.. గ్రామ పంచాయతీ జనరల్ బాడీ సమావేశానికి ఎలాంటి ఆహ్వానం లేకుండా బైరు యాదయ్య వచ్చారని, తాను వార్డు సభ్యుడిగా గ్రామ పంచాయతీ నిధుల ఖర్చుల వివరాల గురించి ప్రశ్నిస్తున్న సమయంలో తన హోదాను కూడా గౌరవించకుండా దురుసుగా ప్రవర్తించారని ఆరోపించారు. ప్రజాప్రతినిధిగా గ్రామ అభివృద్ధి పనులు, వాటికి సంబంధించిన ఖర్చుల వివరాలను అడిగే హక్కు తనకు ఉందని ఆయన పేర్కొన్నారు. ట్రాక్టర్ టైర్ల కొనుగోలు బిల్లులపై ప్రశ్నలుగ్రామ పంచాయతీ ట్రాక్టర్‌కు మూడు టైర్లు కొనుగోలు చేసినట్లు రికార్డుల్లో చూపించారని, ఇందుకు సంబంధించిన బిల్లుల వివరాలపై తనకు సందేహాలు ఉన్నాయని చింత ఆంజనేయులు తెలిపారు. తన వాదన ప్రకారం, 07-02-2026 తేదీతో ఉన్న బిల్లు నంబర్ 106లో రూ.6,250గా, అదే తేదీతో ఉన్న మరో బిల్లు నంబర్ 418లో కూడా రూ.6,250గా నమోదు చేశారని పేర్కొన్నారు.

ఈ రెండు బిల్లులకు సంబంధించిన కొనుగోళ్ల వివరాలు, చెల్లింపుల స్వరూపం, ఖర్చుల నమోదు విధానం ఏమిటో గ్రామ పంచాయతీ కార్యదర్శిని అడిగినట్లు తెలిపారు. అయితే, తన ప్రశ్నలకు సమాధానాలు ఇవ్వాల్సిన సమయంలో సర్పంచ్ తండ్రి జోక్యం చేసుకుని, తాను లెక్కలు అడగడానికి ఎవరు అంటూ ప్రశ్నిస్తూ బెదిరించారని ఆరోపించారు.గత గ్రామసభలోనూ వివరాలు వెల్లడించలేదని ఆరోపణ గత గ్రామసభలో కూడా గ్రామ పంచాయతీ నిధుల ఖర్చుల వివరాల గురించి అడిగినప్పటికీ సంబంధిత కార్యదర్శి స్పష్టమైన సమాధానం ఇవ్వలేదని చింత ఆంజనేయులు ఆరోపించారు. తాజాగా జరిగిన జనరల్ బాడీ సమావేశంలోనూ అదే అంశంపై ప్రశ్నించగా వివాదం తలెత్తిందని తెలిపారు. గ్రామ పంచాయతీకి సంబంధించిన ఆదాయం, ఖర్చులు, అభివృద్ధి పనుల బిల్లుల వివరాలను ప్రజాప్రతినిధులకు, గ్రామ ప్రజలకు స్పష్టంగా తెలియజేయాలని ఆయన కోరారు. వార్డు సభ్యులకు రక్షణ కల్పించాలని విజ్ఞప్తిగ్రామ పంచాయతీ నిధుల ఖర్చులపై ప్రశ్నించినందుకు ప్రజాప్రతినిధులపై బెదిరింపులు, దురుసు ప్రవర్తన చోటుచేసుకుంటే గ్రామ అభివృద్ధి పనుల పర్యవేక్షణకు ఆటంకం కలిగే అవకాశం ఉందని చింత ఆంజనేయులు ఆందోళన వ్యక్తం చేశారు. ఇలాంటి ఘటనలు పునరావృతం కాకుండా సంబంధిత అధికారులు స్పందించాలని, గ్రామ పంచాయతీ నిధుల ఖర్చులపై పూర్తిస్థాయి వివరాలను పరిశీలించి పారదర్శకతకు చర్యలు తీసుకోవాలని కోరారు. అలాగే వార్డు సభ్యులకు విధుల నిర్వహణలో తగిన రక్షణ కల్పించాలని విజ్ఞప్తి చేశారు.