పేరుకే హెల్త్ కార్డులు.. వైద్యం మాత్రం సొంత ఖర్చులతోనే!

రాష్ట్ర ప్రభుత్వం అమలు చేస్తున్న ఉద్యోగుల ఆరోగ్య పథకం (ఈహెచ్‌ఎస్‌) అమలుపై ఉద్యోగులు, ఉపాధ్యాయులు, రిటైర్డ్ ఉద్యోగుల్లో తీవ్ర అసంతృప్తి నెలకొందని రిటైర్డ్ ఒకేషనల్ టీచర్స్ అసోసియేషన్ అధ్యక్షుడు ఎడబోయిన శ్రీనివాసరెడ్డి పేర్కొన్నారు. ఉద్యోగులకు ఆరోగ్య భద్రత కల్పించాల్సిన హెల్త్‌ కార్డులు ఆచరణలో ఆశించిన ప్రయోజనాలను అందించకపోవడం ఆందోళనకరమని అన్నారు. కార్డులు చేతిలో ఉన్నా, అవసరమైన సమయంలో నగదు రహిత వైద్యం అందకపోతే వాటి వల్ల ప్రయోజనం ఏమిటని ప్రశ్నించారు.కార్డులున్నా క్యాష్‌లెస్‌ వైద్యం అందేదెప్పుడు?ఈహెచ్‌ఎస్‌ కింద నగదు రహిత వైద్యం అందించేందుకు ప్రభుత్వం స్పష్టమైన ఏర్పాట్లు చేయాలని శ్రీనివాసరెడ్డి డిమాండ్‌ చేశారు. కొన్ని ఆసుపత్రుల్లో హెల్త్‌ కార్డుల చెల్లుబాటుపై స్పష్టత లేకపోవడం, ముందుగా సొంత డబ్బులతో చికిత్స చేయించుకోవాలని సూచిస్తున్నారనే ఫిర్యాదులు ఉద్యోగులను ఆర్థిక ఇబ్బందులకు గురిచేస్తున్నాయని పేర్కొన్నారు. అత్యవసర వైద్య పరిస్థితుల్లో అప్పులు చేసి చికిత్స పొందాల్సి వస్తే ఆరోగ్య పథకం ఉద్దేశమే దెబ్బతింటుందని అన్నారు.ఆసుపత్రులతో ఒప్పందాలపై స్పష్టత ఇవ్వాలిప్రైవేట్‌, కార్పొరేట్‌ ఆసుపత్రుల్లో ఈహెచ్‌ఎస్‌ కార్డుల ద్వారా వైద్యం పొందేందుకు అవసరమైన ఒప్పందాలు, ప్యాకేజీ ధరలు, చికిత్సా విధానాలపై ప్రభుత్వం స్పష్టత ఇవ్వాలని కోరారు. ఏయే ఆసుపత్రుల్లో నగదు రహిత వైద్యం అందుబాటులో ఉందో ఉద్యోగులకు తెలియజేయాలని, కార్డులు ఉన్నప్పటికీ సేవలు నిరాకరించే పరిస్థితులపై ఫిర్యాదులు స్వీకరించి తక్షణ పరిష్కారం చూపాలని డిమాండ్‌ చేశారు.ఉద్యోగుల ఆరోగ్య భద్రతపై నిర్లక్ష్యం వద్దుఉద్యోగులు, ఉపాధ్యాయులు, రిటైర్డ్ ఉద్యోగులు, వారి కుటుంబ సభ్యులకు నాణ్యమైన వైద్య సేవలు అందేలా ఈహెచ్‌ఎస్‌ వ్యవస్థను పటిష్టం చేయాలని శ్రీనివాసరెడ్డి ప్రభుత్వాన్ని కోరారు. హెల్త్‌ కార్డుల జారీతోనే బాధ్యత ముగిసినట్లు భావించకుండా, ఆసుపత్రుల్లో వాటి అమలు తీరును నిరంతరం పర్యవేక్షించాలని సూచించారు. ఈహెచ్‌ఎస్‌ ట్రస్ట్‌ పనితీరుపై ఉద్యోగ సంఘాలు సమీక్షించి, ఉద్యోగుల సమస్యల పరిష్కారానికి సమష్టిగా కృషి చేయాలని అన్నారు.ఉద్యోగుల నుంచి ఆరోగ్య పథకం కోసం వసూలు చేస్తున్న మొత్తానికి తగిన వైద్య ప్రయోజనాలు అందేలా ప్రభుత్వం చర్యలు తీసుకోవాలని, సమస్యలు పరిష్కారం కాకపోతే ఉద్యోగ సంఘాలు న్యాయపరమైన మార్గాలను పరిశీలించాల్సిన పరిస్థితి ఏర్పడుతుందని ఎడబోయిన శ్రీనివాసరెడ్డి హెచ్చరించారు.