పేదింటి ఆడబిడ్డలకు ప్రభుత్వం అండ

 భద్రాద్రి కొత్తగూడెం :  తెలంగాణ రాష్ట్ర ప్రభుత్వం పేద, మధ్యతరగతి కుటుంబాల ఆడపిల్లల వివాహాలకు  ఆపదలో అనారోగ్య సమస్యలతో బాధపడుతున్న వారికి వైద్య సహాయం కోసం ఆర్థిక భరోసా కల్పించాలనే లక్ష్యంతో ప్రతిష్టాత్మకంగా అమలు చేస్తున్న కళ్యాణ లక్ష్మి పథకం  సీఎం రిలీఫ్ ఫండ్ కింద నిర్వహించిన చెక్కుల పంపిణీ కార్యక్రమం శుక్రవారం కొత్తగూడెం క్లబ్ లో నిర్వహించారు. ఈ కార్యక్రమానికి కొత్తగూడెం ఎమ్మెల్యే కూనంనేని సాంబశివరావు ముఖ్య అతిథిగా హాజరై, అర్హత సాధించిన లబ్ధిదారులకు కళ్యాణ లక్ష్మి, సిఎం రిలీఫ్ ఫండ్ చెక్కులను స్వయంగా అందజేశారు. ఈ కార్యక్రమంలో ఈ సందర్భంగా సర్పంచ్ లావుడ్యా పూర్ణ మాట్లాడుతూ‌‌.. పేదరికం కారణంగా ఆడపిల్లల వివాహాల్లో కుటుంబాలు ఎదుర్కొనే ఆర్థిక ఒత్తిడిని తగ్గించేందుకు కళ్యాణ లక్ష్మి పథకం ఎంతో కీలక పాత్ర పోషిస్తోందని అన్నారు. ముఖ్యంగా గిరిజన ప్రాంతాలు, గ్రామీణ ప్రాంతాల్లో ఈ పథకం వేలాది కుటుంబాలకు ఆశాజ్యోతిగా మారిందని తెలిపారు. అనారోగ్య సమస్యలతో మదనపడుతున్న వారికి వైద్యం చేయించుకునేందుకు సిఎం రిలీఫ్ ఫండ్ ఎంతగానో దోహదపడుతుందని తెలిపారు. ప్రభుత్వ సంక్షేమ పథకాలు ప్రజలకు అందుబాటులోకి రావడం వల్ల సమాజంలో సామాజిక భద్రత మరింత బలపడుతోందని పేర్కొన్నారు. గ్రామ పంచాయతీ స్థాయిలో ప్రతి అర్హత కుటుంబానికి సంక్షేమ పథకాలు అందేలా ప్రత్యేక చర్యలు తీసుకుంటున్నామని చెప్పిన సర్పంచ్, కళ్యాణ లక్ష్మి షాదీ ముబారక్ రైతు బంధు రైతు భీమా వంటి పథకాలు గ్రామ ప్రజల జీవితాల్లో గణనీయమైన మార్పులు తీసుకువస్తున్నాయని వివరించారు. మహిళల సాధికారతే అభివృద్ధికి పునాది అని పేర్కొన్న ఆయన, మహిళల  భద్రత ఆర్థిక స్వావలంబన కోసం రాష్ట్ర ప్రభుత్వం తీసుకుంటున్న నిర్ణయాలు ప్రశంసనీయం అని అన్నారు.
      రేగళ్ల పెద్దతండా గ్రామాభివృద్ధి తమ ప్రధాన ధ్యేయమని స్పష్టం చేసిన సర్పంచ్ లావుడ్యా పూర్ణ, గ్రామంలో మౌలిక సదుపాయాల అభివృద్ధి, తాగునీటి సరఫరా, పారిశుధ్యం, విద్య, ఆరోగ్యం వంటి అంశాలపై నిరంతరం దృష్టి సారిస్తున్నామని తెలిపారు. ప్రభుత్వ పథకాలు కేవలం పత్రాలకే పరిమితం కాకుండా అర్హులైన ప్రతి ఒక్కరికి వాస్తవంగా అందేలా అధికారులు, సిబ్బందితో సమన్వయం చేసుకుంటూ పనిచేస్తున్నామని చెప్పారు. ఈ కార్యక్రమంలో చెక్కులు అందుకున్న లబ్ధిదారులు మాట్లాడుతూ, ఆడపిల్లల వివాహాలకు ప్రభుత్వం అందిస్తున్న ఆర్థిక సహాయం తమ కుటుంబాలకు ఎంతో ఉపశమనంగా మారిందని తెలిపారు. ఇలాంటి సంక్షేమ పథకాలను అమలు చేస్తున్న రాష్ట్ర ప్రభుత్వానికి, గ్రామ స్థాయిలో చురుకైన పాత్ర పోషిస్తున్న సర్పంచ్ లావుడ్యా పూర్ణకు వారు కృతజ్ఞతలు తెలియజేశారు. ఈ కార్యక్రమంలో గ్రామ పెద్దలు  ప్రజాప్రతినిధులు మహిళా సంఘాల సభ్యులు  అధికారులు  లబ్ధిదారులు పెద్ద సంఖ్యలో పాల్గొని కార్యక్రమాన్ని విజయవంతం చేశారు.