నేడే రాఖీ పౌర్ణమి..

నల్లబెల్లి,వరంగల్ జిల్లా : భారతీయ సంస్కృతి, సంప్రదాయాల్లో అన్నాచెల్లెళ్ల అనుబంధానికి ప్రతీకగా నిలిచే రాఖీ పౌర్ణమి పండుగ నేడే భక్తిశ్రద్ధలతో జరుపుకోనున్నారు. ఈ సందర్భంగా సోదరీమణులు తమ సోదరుల చేతికి రాఖీ కట్టి, వారి ఆయురారోగ్యాలు, సుఖసంతోషాలు కలకాలం ఉండాలని ఆకాంక్షిస్తారు.రాఖీ అనేది కేవలం ఒక దారం మాత్రమే కాదు.. అన్నాచెల్లెళ్ల మధ్య ఉన్న ప్రేమ, ఆప్యాయత, నమ్మకానికి ప్రతీకగా భావిస్తారు. సోదరుడు తన సోదరికి ఎల్లప్పుడూ అండగా ఉంటానని, ఆమెను కాపాడుకుంటానని ఈ సందర్భంగా మాట ఇస్తాడు.పౌర్ణమి సందర్భంగా ఉదయం నుంచే ఇళ్లల్లో పండుగ వాతావరణం నెలకొననుంది. కొత్త వస్త్రాలు ధరించి, పూజలు నిర్వహించి, కుటుంబ సభ్యులతో కలిసి ఈ పండుగను ఆనందంగా జరుపుకోవడానికి ఏర్పాట్లు చేసుకుంటున్న మార్కెట్లలో ఇప్పటికే రంగురంగుల రాఖీలు, మిఠాయిల కొనుగోళ్లు జోరందుకున్నాయి. చిన్నారుల నుంచి పెద్దల వరకు తమకు నచ్చిన రాఖీలను ఎంపిక చేసుకుంటున్నారు.దూర ప్రాంతాల్లో ఉన్న సోదరులకు సైతం రాఖీలు పంపిస్తూ తమ ప్రేమాభిమానాలను చాటుకుంటున్నారు. ఆధునిక సాంకేతికత పెరిగినా, అన్నాచెల్లెళ్ల మధ్య ఉండే ఆప్యాయత మాత్రం ఈ పండుగ ద్వారా మరింత బలపడుతోంది.ప్రేమకు ప్రతీకగా, అనుబంధాలకు వారధిగా నిలిచే రాఖీ పౌర్ణమి పండుగను ప్రతి కుటుంబం ఆనందోత్సాహాలతో జరుపుకోవాలని పలువురు ఆకాంక్షిస్తున్నారు.