తెలంగాణ కాంగ్రెస్‌లో ముదురుతున్న ‘ఒరిజినల్‌ కాంగ్రెస్‌ vs ఎల్లో కాంగ్రెస్‌’ పంచాయతీ 

హైదరాబాద్‌: తెలంగాణ కాంగ్రెస్‌ పార్టీలో ‘ఒరిజినల్‌ కాంగ్రెస్‌’ వర్సెస్‌ ‘ఎల్లో కాంగ్రెస్‌–ఫిరాయింపు కాంగ్రెస్‌’ అంశం క్రమంగా రాజకీయ చర్చగా మారుతోంది. మంత్రులు, ఎమ్మెల్యేల స్థాయి నుంచి క్షేత్రస్థాయి కార్యకర్తల వరకు పాత కాంగ్రెస్‌ నేతలు, ఇతర పార్టీల నుంచి కాంగ్రెస్‌లోకి వచ్చిన నేతల మధ్య విభేదాలు కొనసాగుతున్నాయనే ప్రచారం పార్టీలో కలకలం రేపుతోంది.ఇటీవల జడ్చర్ల కాంగ్రెస్‌ ఎమ్మెల్యే అనిరుధ్‌ రెడ్డి చేసిన వ్యాఖ్యలు ఈ వివాదానికి మరింత ఆజ్యం పోశాయి. టీడీపీ, బీఆర్‌ఎస్‌ నుంచి కాంగ్రెస్‌లోకి వచ్చిన నాయకులకు సంబంధించిన బిల్లులు విడుదల అవుతున్నాయని, తమలాంటి ఒరిజినల్‌ కాంగ్రెస్‌ నాయకుల బిల్లులు ఎందుకు విడుదల కావడం లేదని ఆయన ప్రశ్నించినట్లు సమాచారం. ఈ వ్యాఖ్యలు పార్టీలో పాత–కొత్త నేతల మధ్య ఉన్న అసంతృప్తిని బహిర్గతం చేశాయని కాంగ్రెస్‌ వర్గాల్లో చర్చ జరుగుతోంది.
వనపర్తిలోనూ విభేదాల సెగ
వనపర్తి నియోజకవర్గంలోనూ ఇదే తరహా పరిస్థితి నెలకొన్నట్లు తెలుస్తోంది. బీఆర్‌ఎస్‌ నుంచి కాంగ్రెస్‌లోకి వచ్చిన మేఘారెడ్డి తనపై, తన కార్యకర్తలపై పెత్తనం చెలాయిస్తున్నారని సీనియర్‌ కాంగ్రెస్‌ నేత చిన్నారెడ్డి గతంలో అసంతృప్తి వ్యక్తం చేసినట్లు సమాచారం. నియోజకవర్గంలోని పాత కాంగ్రెస్‌ కార్యకర్తలు కూడా తమకు పార్టీ కార్యాలయంలో తగిన ప్రాధాన్యం దక్కడం లేదని వాపోతున్నట్లు తెలుస్తోంది.
బీఆర్‌ఎస్‌ నుంచి వచ్చిన నేతలు, వారి అనుచరులకే పార్టీ కార్యక్రమాల్లో ప్రాధాన్యం లభిస్తోందని కొందరు పాత కాంగ్రెస్‌ కార్యకర్తలు ఆవేదన వ్యక్తం చేస్తున్నట్లు సమాచారం.
ఇన్‌చార్జ్‌ మంత్రులపై ఎమ్మెల్యేల అసంతృప్తి?
మరోవైపు కొందరు కాంగ్రెస్‌ ఎమ్మెల్యేలు తమ నియోజకవర్గాలపై ఇన్‌చార్జ్‌ మంత్రుల దృష్టి లేదని అసంతృప్తి వ్యక్తం చేస్తున్నట్లు ప్రచారం జరుగుతోంది. 2023 ఎన్నికల తర్వాత తమ నియోజకవర్గానికి ఇన్‌చార్జ్‌ మంత్రి దామోదర రాజనర్సింహ ఒక్కసారి కూడా రాలేదని, కార్యకర్తలను పట్టించుకోవడం లేదని ఓ కాంగ్రెస్‌ ఎమ్మెల్యే ఆవేదన వ్యక్తం చేసినట్లు సమాచారం.
ఇక మునుగోడు ఎమ్మెల్యే కోమటిరెడ్డి రాజగోపాల్‌ రెడ్డి సైతం సీఎం రేవంత్‌ రెడ్డి వ్యవహారశైలిపై అసంతృప్తి వ్యక్తం చేసినట్లు ప్రచారం సాగుతోంది. ముఖ్యమంత్రితో ఆయన సహచర మంత్రులు కూడా వేగలేకపోతున్నారని, అయితే ఆ విషయాలను బయటకు చెప్పలేకపోతున్నారని రాజగోపాల్‌ రెడ్డి వ్యాఖ్యానించినట్లు సమాచారం.
పదవుల పంపకంపై పాత కాంగ్రెస్‌ శ్రేణుల్లో అసంతృప్తి
నామినేటెడ్‌ పదవులు, వివిధ కమిటీల ఇన్‌చార్జ్‌ బాధ్యతలు, ఇతర పార్టీ పదవుల్లోనూ ఫిరాయింపు నేతల అనుచరులకే ప్రాధాన్యం లభిస్తోందని పాత కాంగ్రెస్‌ శ్రేణులు ఆరోపిస్తున్నాయి. ఏళ్ల తరబడి పార్టీ కోసం పనిచేసిన తమను పక్కనపెట్టి, ఎన్నికల సమయంలో లేదా ఆ తర్వాత పార్టీలో చేరిన వారికి పదవులు ఇవ్వడంపై వారు తీవ్ర అసంతృప్తితో ఉన్నట్లు తెలుస్తోంది.ప్రభుత్వం ఏర్పడి దాదాపు మూడేళ్లు పూర్తవుతున్న నేపథ్యంలో ఇప్పుడు పదవులు ఇస్తామని చెప్పడం వల్ల తమకు పెద్దగా ప్రయోజనం ఉండదని కొందరు పాత కాంగ్రెస్‌ కార్యకర్తలు అంటున్నట్లు సమాచారం. ఎన్నికల హడావుడిని పక్కనపెడితే పదవుల్లో ఉండే సమయం తక్కువగానే మిగిలిందని, ఇంతకాలం అధికారాన్ని అనుభవించిన తర్వాత ఇప్పుడు తమను గుర్తు చేసుకోవడం ఎందుకని వారు ప్రశ్నిస్తున్నట్లు తెలుస్తోంది.
ఎన్నికలపై ప్రభావం ఉంటుందా?
పాత కాంగ్రెస్‌–ఫిరాయింపు నేతల మధ్య అసంతృప్తి కొనసాగితే వచ్చే ఎన్నికల నాటికి అది పార్టీకి ప్రతికూలంగా మారే అవకాశం ఉందని రాజకీయ వర్గాల్లో చర్చ జరుగుతోంది. క్షేత్రస్థాయిలో పార్టీకి బలమైన కార్యకర్తలే ఎన్నికల సమయంలో కీలక పాత్ర పోషిస్తారని, వారిలో అసంతృప్తి పెరిగితే దాని ప్రభావం ఎన్నికల ఫలితాలపై పడే అవకాశం ఉందని రాజకీయ విశ్లేషకులు అభిప్రాయపడుతున్నారు.
రంగంలోకి మీనాక్షి నటరాజన్‌?
సీఎం రేవంత్‌ రెడ్డి తీరుపై పార్టీ నేతల నుంచి వరుసగా ఫిర్యాదులు, విమర్శలు వస్తున్న నేపథ్యంలో తెలంగాణ కాంగ్రెస్‌ వ్యవహారాల ఇన్‌చార్జ్‌ మీనాక్షి నటరాజన్‌ క్షేత్రస్థాయిలో సమావేశాలు నిర్వహిస్తున్నట్లు సమాచారం. పార్టీ కోసం పనిచేసి నష్టపోయిన వర్గాలను సమన్వయం చేయడం, కార్యకర్తల సమస్యలను తెలుసుకోవడం, పార్టీ అంతర్గత విభేదాలను తగ్గించే ప్రయత్నాలు జరుగుతున్నట్లు కాంగ్రెస్‌ వర్గాల్లో చర్చ సాగుతోంది. మొత్తంగా తెలంగాణ కాంగ్రెస్‌లో ‘ఒరిజినల్‌ కాంగ్రెస్‌’ వర్సెస్‌ ‘ఎల్లో కాంగ్రెస్‌–ఫిరాయింపు కాంగ్రెస్‌’ అనే చర్చ రోజురోజుకూ వేడెక్కుతున్నట్లు కనిపిస్తోంది. ఈ అంతర్గత అసంతృప్తికి పార్టీ నాయకత్వం ఎంత త్వరగా పరిష్కారం చూపుతుందన్నది ఇప్పుడు కీలకంగా మారింది. అయితే ఈ విభేదాలు కొనసాగితే వచ్చే ఎన్నికల్లో కాంగ్రెస్‌ పార్టీపై ప్రభావం చూపే అవకాశం ఉందని రాజకీయ విశ్లేషకులు అంచనా వేస్తున్నారు.