రాఖీ పౌర్ణమి వేడుకల్లో వెల్లివిరిసిన అన్నాచెల్లెళ్ల ఆప్యాయత

అన్నాచెల్లెళ్ల అనుబంధానికి ప్రతీకగా రక్షాబంధన్ సంబరాలు

చౌటకూర్,: రాఖీ పౌర్ణమి పర్వదినాన్ని పురస్కరించుకుని సంగారెడ్డి జిల్లా చౌటకూర్ మండల కేంద్రంతో పాటు పరిసర గ్రామాల్లో అన్నాచెల్లెళ్లు, అక్కాతమ్ముళ్ల మధ్య ప్రేమానురాగాలు వెల్లివిరిశాయి. పవిత్రమైన రాఖీ పండుగ సందర్భంగా ఆడపడుచులు తమ సోదరులకు ప్రేమతో రాఖీలు కట్టి, వారి క్షేమం, ఆయురారోగ్యాలను ఆకాంక్షించారు.సంప్రదాయబద్ధంగా హారతులు ఇచ్చి, రాఖీలు కట్టిన అనంతరం మిఠాయిలు తినిపించి తమ ప్రేమను చాటుకున్నారు. అన్నదమ్ములు సైతం సోదరీమణులకు కానుకలు అందజేసి, జీవితాంతం వారికి రక్షణగా, అండగా ఉంటామని భరోసానిచ్చారు. చిన్ననాటి జ్ఞాపకాలను గుర్తు చేసుకుంటూ కుటుంబ సభ్యులంతా ఆనందోత్సాహాల మధ్య పండుగను జరుపుకున్నారు.ఈ సందర్భంగా సోదరీమణులు మాట్లాడుతూ.. తమ అనుబంధం కలకాలం ఇలాగే కొనసాగాలని, సోదరుల జీవితాల్లో సుఖసంతోషాలు నిండాలని ఆకాంక్షించారు. కుటుంబ సభ్యుల కలయికతో పల్లెలు, పట్టణాల్లో పండుగ సందడి నెలకొంది.

About The Author

Vision Andhra Telugu Daily

నిజాయితీ, నిష్పాక్షికత, విశ్వసనీయత అనే మూడు విలువలను ఆధారంగా చేసుకుని పనిచేస్తున్న వార్తా సంస్థ. సమాజంలో జరుగుతున్న ప్రతి ముఖ్యమైన పరిణామాన్ని వేగంగా, ఖచ్చితంగా, బాధ్యతాయుతంగా పాఠకులకు అందించడం మా ప్రధాన లక్ష్యం.