చౌటకూర్ రైతు వేదికలో మండల స్థాయి సమీక్ష సమావేశం

చౌటకూర్ : సంగారెడ్డి జిల్లా కలెక్టర్ ఆదేశాల మేరకు మండలంలో అమలవుతున్న కేంద్ర, రాష్ట్ర ప్రభుత్వ ఫ్లాగ్‌షిప్ కార్యక్రమాల పురోగతిపై బుధవారం చౌటకూర్ మండలం కేంద్రంలో రైతు వేదికలో మండల స్థాయి సమీక్ష సమావేశం నిర్వహించారు. మండల స్పెషల్ ఆఫీసర్ వసంత కుమారి అధ్యక్షతన జరిగిన ఈ సమావేశంలో వివిధ ప్రభుత్వ శాఖల అధికారులు, పంచాయతీ కార్యదర్శులు, ఈజీఎస్ సిబ్బంది పాల్గొన్నారు. సమావేశంలో గ్రామస్థాయిలో అమలవుతున్న అభివృద్ధి కార్యక్రమాలు, ఉపాధి హామీ పనులు, పారిశుద్ధ్యం, పల్లె అభివృద్ధి, సంక్షేమ పథకాల అమలు, ప్రభుత్వ లక్ష్యాల సాధన తదితర అంశాలపై సమగ్రంగా సమీక్షించారు. ప్రతి శాఖ అధికారి తమ పరిధిలోని కార్యక్రమాల పురోగతి వివరాలను నివేదించారు. అధికారులకు స్పెషల్ ఆఫీసర్ మార్గదర్శకాలు ఈ సందర్భంగా స్పెషల్ ఆఫీసర్ వసంత కుమారి మాట్లాడుతూ, ప్రభుత్వం అత్యంత ప్రాధాన్యతనిస్తున్న ఫ్లాగ్‌షిప్ కార్యక్రమాలను నిర్దేశించిన గడువుల్లో నాణ్యతతో పూర్తి చేయాలని అధికారులను ఆదేశించారు. ప్రజలకు ప్రభుత్వ సేవలు సకాలంలో అందేలా అన్ని శాఖలు సమన్వయంతో పనిచేయాలని సూచించారు. పెండింగ్ పనులను త్వరితగతిన పూర్తి చేసి, పురోగతి నివేదికలను ఎప్పటికప్పుడు అందించాలని తెలిపారు. సమావేశంలో ఎంపీఓ సువర్ణ, డిప్యూటీ తహసీల్దార్ అనుదీప్, మండల స్థాయి అధికారులు, పంచాయతీ కార్యదర్శులు, ఈజీఎస్ సిబ్బంది మరియు వివిధ శాఖల ప్రతినిధులు పాల్గొన్నారు. సమావేశం అనంతరం ఆయా శాఖలకు సంబంధించిన కార్యాచరణపై అధికారులకు స్పష్టమైన మార్గదర్శకాలు జారీ చేశారు.