నిమ్స్‌లో అవినీతికి అడ్డూ అదుపు లేదా?

హుస్నాబాద్, : నిమ్స్ ఆసుపత్రిలో అవినీతి, అక్రమ వసూళ్లు, పేషెంట్ల పట్ల సిబ్బంది నిర్లక్ష్యంపై ప్రభుత్వం తక్షణమే స్పందించి సమగ్ర విచారణ జరిపించాలని ఎంసిపిఐ(సి) రాష్ట్ర కార్యదర్శి కా. లింగంపల్లి శ్రీనివాస్ రెడ్డి డిమాండ్ చేశారు. రాష్ట్ర ఆరోగ్య శాఖ మంత్రి దామోదర రాజనర్సింహ వెంటనే జోక్యం చేసుకుని ఆరోపణలు నిజమని తేలితే బాధ్యులపై కఠిన చర్యలు తీసుకోవాలని కోరారు. నిమ్స్‌లో అవుట్‌సోర్సింగ్ ఉద్యోగాల నియామకాల పేరుతో ఒక్కో అభ్యర్థి నుంచి రూ.లక్ష నుంచి రూ.5 లక్షల వరకు వసూలు చేస్తున్నారనే ఆరోపణలు వస్తున్నాయని శ్రీనివాస్ రెడ్డి తెలిపారు. ఇటీవల ఈ వ్యవహారానికి సంబంధించి ఒక వ్యక్తిని ఏసీబీ అధికారులు అరెస్టు చేసినట్లు పేర్కొన్నారు. ఈ నేపథ్యంలో కేవలం ఒకరి అరెస్టుతో వ్యవహారాన్ని ముగించకుండా, అక్రమ వసూళ్ల వెనుక ఉన్న మొత్తం వ్యవస్థపై సమగ్ర దర్యాప్తు జరిపించాలని డిమాండ్ చేశారు. నిమ్స్ వంటి ప్రభుత్వ ఆధ్వర్యంలోని ప్రముఖ ఆసుపత్రిలో సిబ్బందిపై పర్యవేక్షణ లోపించడంతో అవినీతికి ప్రతి పనికి ఒక రేటు నిర్ణయించినట్లుగా పరిస్థితి తయారైందనే ఆరోపణలు వస్తున్నాయని ఆయన అన్నారు. అవినీతి సొమ్మును పలువురు కలిసి పంచుకుంటున్నారనే ఆరోపణలపై కూడా ఉన్నతస్థాయి విచారణ జరిపించాలని కోరారు. సిబ్బంది మధ్య సమన్వయం లేకపోవడం వల్ల పేషెంట్లు తీవ్ర ఇబ్బందులు ఎదుర్కొంటున్నారని శ్రీనివాస్ రెడ్డి ఆరోపించారు. డాక్టర్లు సూచనలు చేసినా నర్సింగ్ సిబ్బంది పట్టించుకోకపోవడం, నర్సులు చెప్పినా ఇతర సహాయక సిబ్బంది స్పందించకపోవడం వంటి పరిస్థితులు ఉన్నాయని తెలిపారు. చివరకు రోగులను పట్టించుకునే వారు లేని పరిస్థితి ఏర్పడటం ఆందోళనకరమన్నారు వైద్యం కోసం నిమ్స్‌కు వచ్చే పేద, మధ్యతరగతి ప్రజలను గౌరవంగా చూడాల్సిన సిబ్బంది కొందరు నిర్లక్ష్యంగా, అమానవీయంగా వ్యవహరిస్తున్నారనే ఫిర్యాదులు వస్తున్నాయని ఆయన పేర్కొన్నారు. కార్పొరేట్ ఆసుపత్రుల్లో తక్కువ సమయంలో పూర్తయ్యే కొన్ని వైద్య ప్రక్రియలు కూడా సిబ్బంది నిర్లక్ష్యం, సమన్వయ లోపం కారణంగా నిమ్స్‌లో ఎక్కువ కాలం కొనసాగుతున్నాయనే ఆరోపణలపై వాస్తవాలను అధికారులు పరిశీలించాలని కోరారు. పేషెంట్లు, వారి బంధువులు సిబ్బందిపై ఫిర్యాదు చేస్తామని చెప్పినా పట్టించుకోని పరిస్థితి ఉందని ఆరోపించారు. ఎల్‌ఓసీ, ఎస్టిమేట్ ఫారాల విషయంలో పేషెంట్లను ఇబ్బందులకు గురిచేస్తున్నారనే ఫిర్యాదులపైనా విచారణ జరిపించాలని డిమాండ్ చేశారు. ముఖ్యంగా గౌతమి అనే సిబ్బందిపై ఎల్‌ఓసీ విషయంలో పేషెంట్లను ఇబ్బంది పెడుతున్నారనే ఆరోపణలు ఉన్నందున, వాటిపై అధికారులు వాస్తవాలను నిర్ధారించి తగిన చర్యలు తీసుకోవాలని కోరారు. ఇటీవల నిమ్స్ అదనవు  సూపర్ఇండెంట్ లక్ష్మీ భాస్కర్ అరెస్టుకు సంబంధించిన అవినీతి వ్యవహారం వెలుగులోకి వచ్చిన నేపథ్యంలో, ఈ కేసులో ఇతరుల ప్రమేయం ఉందనే ఆరోపణలపైనా సమగ్ర దర్యాప్తు జరిపించాలని శ్రీనివాస్ రెడ్డి అన్నారు. అరెస్టుతోనే విచారణను ముగించకుండా, ఆరోపణలకు సంబంధించిన వ్యక్తుల పాత్ర, ఆర్థిక లావాదేవీలు, నియామక ప్రక్రియ, సంబంధిత అధికారుల పర్యవేక్షణ తదితర అంశాలపై పూర్తి స్థాయిలో దర్యాప్తు చేయాలని కోరారు. ప్రభుత్వ నిధులు దుర్వినియోగం కాకుండా, పేదలకు అందాల్సిన వైద్య సేవలు సక్రమంగా అందేలా నిమ్స్‌లో పారదర్శకమైన పర్యవేక్షణ వ్యవస్థను ఏర్పాటు చేయాలని లింగంపల్లి శ్రీనివాస్ రెడ్డి డిమాండ్ చేశారు. అవినీతి, అక్రమ వసూళ్లు, సిబ్బంది నిర్లక్ష్యంపై ఉన్నతస్థాయి విచారణ కమిటీని ఏర్పాటు చేసి, విచారణ నివేదికను ప్రజలకు వెల్లడించాలని కోరారు.