పుస్తక పఠనంతోనే విద్యార్థులకు జ్ఞానం, జ్ఞాపకశక్తి వికాసం,,ఆర్జేడీ ఎం. సోమిరెడ్డి 

​కొల్లాపూర్ :  విద్యార్థులు పాఠ్యపుస్తకాలతో పాటు కథలు, సాహిత్యం, చరిత్ర, విజ్ఞాన సంబంధిత పుస్తకాలను విస్తృతంగా చదవడం ద్వారా జ్ఞానాన్ని, సృజనాత్మక ఆలోచనా శక్తిని, ఊహాశక్తిని, జ్ఞాపకశక్తిని పెంపొందించుకోవచ్చని హైదరాబాద్ ప్రాంతీయ విద్యా సంచాలకులు (ఆర్జేడీ) ఎం. సోమిరెడ్డి పిలుపునిచ్చారు. ​బుధవారం ఆయన కొల్లాపూర్ లోని కస్తూరిబా గాంధీ బాలికల విద్యాలయం (కేజీబీవీ)ని సందర్శించారు. ​కేజీబీవీకి రూ. 50 వేల విలువైన సొంత సాయం ​విద్యార్థుల అవసరాల కోసం ఆర్జేడీ ఎం. సోమిరెడ్డి తన సొంత నిధుల నుంచి రూ. 50 వేల విలువైన సామగ్రిని అందజేశారు. రూ. 40,000 విలువైన రోటి మేకింగ్ మిషన్ ​రూ. 10,000 విలువైన తెలుగు, ఇంగ్లీష్, హిందీ భాషలకు చెందిన కథలు, సాహిత్యం, చరిత్ర, పెద్దబాలశిక్ష వంటి సుమారు 100 రకాల పుస్తకాలు ఉన్నాయి. ​సామగ్రి పంపిణీ అనంతరం విద్యార్థులతో కలిసి ఆయన పుస్తక పఠన కార్యక్రమంలో పాల్గొన్నారు. పుస్తకాలను చదవడమే కాకుండా, అందులోని విషయాలను అర్థం చేసుకుని కొత్త విషయాలు నేర్చుకునేలా పఠన అలవాటును పెంపొందించుకోవాలని సూచించారు. ఉపాధ్యాయులు కూడా పాఠశాలల్లో పఠన సంస్కృతిని ప్రోత్సహించాలని, కేజీబీవీలలో ప్రభుత్వం కల్పిస్తున్న సదుపాయాలను విద్యార్థులు సద్వినియోగం చేసుకుని ఉన్నత స్థాయికి ఎదగాలని ఆకాంక్షించారు. ​ప్రాథమిక పాఠశాల సందర్శన –  ఎఫ్ ఎల్ ఎన్ అమలుపై ఆదేశాలు ​అనంతరం కొల్లాపూర్ పట్టణంలోని ప్రాథమిక పాఠశాలను సందర్శించి విద్యార్థులు, ఉపాధ్యాయుల హాజరు శాతాన్ని పరిశీలించారు. ప్రాథమిక స్థాయి నుంచే విద్యార్థులకు బలమైన విద్యా పునాది పడేలా శ్రద్ధ వహించాలని, పాఠశాలల్లో 'ఫౌండేషనల్ లిటరసీ అండ్ న్యూమరసీ' (ఎఫ్ ఎల్ ఎన్) కార్యక్రమాన్ని సమర్థవంతంగా అమలు చేయాలని ఉపాధ్యాయులను ఆదేశించారు. ​ఈ కార్యక్రమంలో పాల్గొన్న కొల్లాపూర్ మున్సిపల్ చైర్‌పర్సన్ రెడ్డి జ్యోతి మాట్లాడుతూ, సొంత నిధులతో రూ. 50 వేల సాయం అందించిన ఆర్జేడీ సోమిరెడ్డికి కృతజ్ఞతలు తెలిపారు. ఉమ్మడి మహబూబ్‌నగర్ జిల్లాలోని కేజీబీవీలకు దాతల సహకారంతో సుమారు రూ. 30 లక్షల విలువైన సామగ్రిని సమకూర్చడం అభినందనీయమని కొనియాడారు. అనంతరం ఆర్జేడీ సోమిరెడ్డిని శాలువాతో సత్కరించారు. ​ఈ కార్యక్రమంలో కొల్లాపూర్ మండల విద్యాధికారి, కేజీబీవీ ప్రత్యేక అధికారి నారాయణమ్మ, ఉపాధ్యాయ సంఘాల నాయకులు, ఉపాధ్యాయులు, విద్యార్థులు పాల్గొన్నారు.