నస్పూర్ (మంచిర్యాల): మంచిర్యాల కలెక్టరేట్ రోడ్డులో భద్రతా చర్యల్లో భాగంగా టీఎన్జీవో హౌసింగ్ సొసైటీ ఆధ్వర్యంలో అత్యాధునిక సీసీ కెమెరాలను ఏర్పాటు చేశారు. టీఎన్జీవో హౌసింగ్ సొసైటీ జిల్లా అధ్యక్షులు గడియారం శ్రీహరి, ప్రధాన కార్యదర్శి హబీబ్ హుస్సేన్ ల నేతృత్వంలో ఈ కార్యక్రమం జరిగింది. కలెక్టరేట్ ప్రధాన మార్గంలోని ఐడీఓసీ కమాన్ వద్ద 3 సీసీ కెమెరాలు, హైవే కమాన్ వద్ద 2 సీసీ కెమెరాల చొప్పున మొత్తం 5 నిఘా కెమెరాలను అమర్చారు. ఈ సందర్భంగా సొసైటీ అధ్యక్షులు గడియారం శ్రీహరి మాట్లాడుతూ... జిల్లా కలెక్టర్ కుమార్ దీపక్ (ఐఏఎస్) మరియు జిల్లా పోలీసు ఉన్నతాధికారుల సూచనల మేరకు సమాజహితం, ప్రజా భద్రతను దృష్టిలో ఉంచుకొని ఈ కెమెరాలను ఏర్పాటు చేసినట్లు తెలిపారు. ఈ మార్గంలో నిరంతరం నిఘా ఉండటం వల్ల శాంతిభద్రతల పరిరక్షణకు, భవిష్యత్తులో రోడ్డు ప్రమాదాలు లేదా అవాంఛనీయ సంఘటనలు జరిగితే వాటిని గుర్తించడానికి ఎంతగానో ఉపయోగపడుతుందని పేర్కొన్నారు. ఈ కార్యక్రమంలో టీఎన్జీవో హౌసింగ్ సొసైటీ కార్యవర్గ సభ్యులు, ప్రతినిధులు తదితరులు పాల్గొన్నారు.
.jpeg)
