కొత్తగూడెం : ప్రముఖ తెలంగాణ సిద్ధాంతకర్త, విద్యావేత్త, తెలంగాణ ఉద్యమ స్ఫూర్తిదాత ప్రొఫెసర్ కొత్తపల్లి జయశంకర్ జయంతిని జిల్లా గ్రంథాలయంలో గురువారం ఘనంగా నిర్వహించారు. ఈ సందర్భంగా జయశంకర్ చిత్రపటానికి పూలమాల వేసి పుష్పాంజలి ఘటించి, తెలంగాణ రాష్ట్ర సాధనలో ఆయన చేసిన విశిష్ట సేవలను స్మరించుకున్నారు.గ్రంథాలయ సంస్థ చైర్మన్ పసుపులేటి వీరబాబు మాట్లాడుతూ, తెలంగాణ రాష్ట్ర ఆవిర్భావానికి ప్రొఫెసర్ జయశంకర్ చేసిన కృషి చిరస్మరణీయమని అన్నారు. తెలంగాణ ప్రజల ఆకాంక్షలను ప్రపంచానికి చాటి చెప్పిన గొప్ప మేధావిగా ఆయన నిలిచారని కొనియాడారు. జయశంకర్ చూపిన దార్శనికత, చేసిన త్యాగాలు నేటి యువతకు ఆదర్శమని పేర్కొన్నారు. మహనీయుల జీవిత చరిత్రలను ప్రజలకు చేరవేయడంలో గ్రంథాలయాలు కీలక పాత్ర పోషించాలని, చదువుపై ఆసక్తిని పెంపొందించేందుకు ప్రతి ఒక్కరూ గ్రంథాలయాలను సద్వినియోగం చేసుకోవాలని పిలుపునిచ్చారు. గ్రంథాలయ సంస్థ కార్యదర్శి కె. కరుణకుమారి మాట్లాడుతూ, జయశంకర్ సేవలు తెలంగాణ చరిత్రలో చిరస్థాయిగా నిలిచిపోతాయని అన్నారు. గ్రేడ్–2 లైబ్రేరియన్ ఎస్. లలిత కుమారి, లైబ్రేరియన్ మణి మృదుల, ఆఫీస్ ఇంచార్జ్ ఎం. నవీన్ కుమార్ మాట్లాడుతూ జయశంకర్ జీవిత విశేషాలు, తెలంగాణ ఉద్యమంలో ఆయన పోషించిన పాత్ర, విద్యా రంగానికి అందించిన సేవలను గుర్తు చేసుకున్నారు. ఈ కార్యక్రమంలో గ్రంథాలయ సిబ్బంది, పాఠకులు, స్థానిక ప్రముఖులు పాల్గొని ప్రొఫెసర్ జయశంకర్కు ఘన నివాళులర్పించారు.
.jpeg)
