కొత్తగూడెం : సింగరేణి కొత్తగూడెం ఏరియాలో తెలంగాణ సిద్ధాంతకర్త, ప్రముఖ విద్యావేత్త, ఆర్థికవేత్త ప్రొఫెసర్ కొత్తపల్లి జయశంకర్ జయంతి వేడుకలను గురువారం ఘనంగా నిర్వహించారు. కొత్తగూడెం ఏరియా జనరల్ మేనేజర్ కార్యాలయంలో జరిగిన కార్యక్రమానికి ఏరియా జనరల్మేనేజర్ సీహెచ్. వెంకటరమణ ముఖ్య అతిథిగా హాజరై జయశంకర్ చిత్రపటానికి పూలమాల వేసి నివాళులర్పించారు. ఈ సందర్భంగా జీఎం వెంకటరమణ మాట్లాడుతూ, ప్రొఫెసర్ జయశంకర్ తెలంగాణ ప్రజల అభివృద్ధి కోసం తన జీవితాన్ని అంకితం చేశారని పేర్కొన్నారు. చిన్ననాటి నుంచే తెలంగాణ ప్రజల హక్కుల కోసం ఆయన పోరాట స్ఫూర్తిని ప్రదర్శించారని, ప్రత్యేక తెలంగాణ రాష్ట్ర సాధనలో ఆయన చేసిన త్యాగాలు, సేవలు చిరస్మరణీయమని అన్నారు. సమాజాభివృద్ధి, ప్రజాసేవ, కర్తవ్య నిర్వహణలో జయశంకర్ ఆశయాలను ప్రతి ఒక్కరూ ఆదర్శంగా తీసుకుని అంకితభావంతో పనిచేయాలని సూచించారు. తెలంగాణ ప్రజల ఆత్మగౌరవానికి ప్రతీకగా నిలిచిన ఆయన భావితరాలకు శాశ్వత స్ఫూర్తిగా నిలుస్తారని చెప్పారు. కార్యక్రమంలో పలువురు వక్తలు మాట్లాడుతూ, ఆచార్య కొత్తపల్లి జయశంకర్ విద్యావేత్తగా, ఆర్థికవేత్తగా, తెలంగాణ సిద్ధాంతకర్తగా సమాజంపై చెరగని ముద్ర వేసిన మహనీయుడని కొనియాడారు. ప్రత్యేక తెలంగాణ రాష్ట్ర ఆవిర్భావానికి ఆయన అందించిన మేధోసహకారం, దూరదృష్టి, నిరంతర కృషి భావితరాలకు మార్గదర్శకమని పేర్కొన్నారు. ఆయన బోధించిన విలువలు, నైతికత, సామాజిక బాధ్యతలను ఆచరణలో పెట్టడమే ఆయనకు నిజమైన నివాళి అని అభిప్రాయపడ్డారు. ఈ కార్యక్రమంలో ఎస్ ఒ టు జీఎం గోవిందరావు, ఐఎన్టీయూసీ వైస్ ప్రెసిడెంట్ ఎండీ రజాక్, ఏఐటీయూసీ ప్రతినిధి సందేబోయిన శ్రీనివాస్, ఏరియా సేఫ్టీ ఆఫీసర్ మొక్కపాటి వెంకటేశ్వర్లు, ఏజీఎం (సివిల్) సీహెచ్. రామకృష్ణ, ఏజీఎం (ఫైనాన్స్) బిబత్స, ఏరియా ఇంజనీర్ వి. రామకృష్ణ, పర్సనల్ మేనేజర్ ఎల్. తిరుపతి, డీవైపీఎం హరీష్, సీనియర్ పీఓ మురళి, ఐఎన్టీయూసీ ఫిట్ సెక్రటరీ సీహెచ్. సాగర్, ఏఐటీయూసీ ఫిట్ సెక్రటరీ కే. సౌజన్యతో పాటు వివిధ విభాగాల అధికారులు, ఉద్యోగులు, కాంట్రాక్ట్ కార్మికులు పాల్గొన్నారు.
.jpeg)
