చౌటకూర్‌లో ఘనంగా సద్దుల బతుకమ్మ సంబరాలు

చౌటకూర్ : సంగారెడ్డి జిల్లా చౌటకూర్ మండల కేంద్రంలోని శ్రీ అన్నపూర్ణ కాశీ విశ్వేశ్వర ఆలయ ప్రాంగణంలో గ్రామ సర్పంచ్ పార్కల రామ్‌రెడ్డి ఆధ్వర్యంలో సద్దుల బతుకమ్మ వేడుకలను తొలిసారిగా భారీ స్థాయిలో ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని నిర్వహించిన ఈ వేడుకలు మహిళలు, గ్రామస్తుల్లో ఉత్సాహాన్ని నింపాయి.ఈ కార్యక్రమానికి ప్రముఖ జానపద గాయని జానుతో పాటు గాయకులు సిద్దిపేట శ్రీనివాస్, రాజ్‌కుమార్ బృందం హాజరై తమ పాటలతో సందడి చేశారు. జానపద కళాకారుల ప్రదర్శనలు, సంప్రదాయ బతుకమ్మ ఆటపాటలతో ఆలయ ప్రాంగణం పండుగ శోభను సంతరించుకుంది. మహిళలు రంగురంగుల పూలతో అలంకరించిన బతుకమ్మల చుట్టూ చేరి పాటలు పాడుతూ ఉత్సాహంగా వేడుకల్లో పాల్గొన్నారు. చౌటకూర్ మండల కేంద్రంలో తొలిసారిగా ఇంత భారీ స్థాయిలో బతుకమ్మ సంబరాలను నిర్వహించడం స్థానికంగా ప్రత్యేక ఆకర్షణగా నిలిచింది. సంప్రదాయాలకు ప్రాధాన్యతనిస్తూ గ్రామస్థులందరినీ ఒకచోట చేర్చేలా వేడుకలను నిర్వహించడంపై పలువురు హర్షం వ్యక్తం చేశారు. జానపద కళాకారుల సందడి, మహిళల ఆటపాటలతో చౌటకూర్‌లో పండుగ వాతావరణం నెలకొంది.ఈ కార్యక్రమంలో గ్రామ ఉప సర్పంచ్ దమ్మి నాగరాణి కృష్ణ, వార్డు సభ్యులు, నాయకులు ప్రభాకర్ రెడ్డి, రాజేశ్వర్ గౌడ్, వర్కల రమేష్, రామా గౌడ్‌తో పాటు మహిళలు, గ్రామస్తులు పెద్ద సంఖ్యలో పాల్గొన్నారు.