మల్లన్న సన్నిధిలో సద్దుల బతుకమ్మ సంబరాలు  రంగురంగుల పూలతో అలంకరించిన బతుకమ్మలు

సిద్దిపేట జిల్లాలోని ప్రముఖ పుణ్యక్షేత్రమైన శ్రీ కొమురెల్లి మల్లికార్జున స్వామి దేవస్థానం ప్రాంగణంలో సద్దుల బతుకమ్మ వేడుకలు ఘనంగా జరిగాయి.తెలంగాణ సంస్కృతి, సంప్రదాయాలకు ప్రతీకగా నిలిచే సద్దుల బతుకమ్మ పండుగను కొమురవెల్లి మండలంలో ఆడపడుచులు అంగరంగ వైభవంగా జరుపుకున్నారు. రంగురంగుల పూలతో బతుకమ్మలను అందంగా పేర్చి, బతుకమ్మ పాటలు పాడుతూ మహిళలు, యువతులు పండుగ సంబరాల్లో మునిగిపోయారు.బతుకమ్మ బతుకమ్మ ఉయ్యాలో..అంటూ మారుమోగిన పాటలు, ఆడపడుచుల సందడితో పల్లెలన్నీ పులకించిపోయాయి. గౌరమ్మకు పసుపు, కుంకుమలతో పూజలు నిర్వహిస్తూ తమ కుటుంబాలు సుఖసంతోషాలతో ఉండాలని, ఎలాంటి కష్టాలు రాకుండా చూడాలని మహిళలు భక్తిశ్రద్ధలతో ప్రార్థించారు. పాడిపంటలు సమృద్ధిగా పండాలని, ప్రజలందరూ ఆయురారోగ్యాలతో వర్ధిల్లాలని అమ్మవారిని వేడుకున్నారు.కొమురవెల్లి మండల కేంద్రంతో పాటు మండలంలోని అన్ని గ్రామాల్లో సద్దుల బతుకమ్మ వేడుకలు పండుగ వాతావరణాన్ని నింపాయి. పూలతో అలంకరించిన బతుకమ్మలు, మహిళల ఆటపాటలు, సంప్రదాయ వేడుకలతో గ్రామాలు కొత్త శోభను సంతరించుకున్నాయి.తరతరాలుగా వస్తున్న తెలంగాణ సంస్కృతి, సంప్రదాయాలను కాపాడుతూ ఆడపడుచులు సద్దుల బతుకమ్మ వేడుకల్లో ఉత్సాహంగా పాల్గొన్నారు. ప్రకృతిని ఆరాధిస్తూ, పూలను పూజిస్తూ జరుపుకునే బతుకమ్మ పండుగ తెలంగాణ ఆడపడుచుల ఐక్యతకు, సాంస్కృతిక వైభవానికి ప్రతీకగా నిలిచింది.