శ్రావణ శుభ ముహూర్తాలతో తెలుగు రాష్ట్రాల్లో పెళ్లిళ్ల సందడి.

ఆగస్టు 13 నుంచి సెప్టెంబర్ 11 వరకు వివాహాలు,
గృహప్రవేశాలు,వ్యాపారాలకు మంచి రోజులు

నాగర్ కర్నూల్ : హిందువులకు ఎంతో పవిత్రమైన శ్రావణ మాసం ఈసారి ఆగస్టు 13వ తేదీ నుంచి ప్రారంభం కానుంది. వచ్చే నెల సెప్టెంబర్ 11 వరకు నెల రోజుల పాటు పలు శుభ ముహూర్తాలు ఉండడంతో తెలుగు రాష్ట్రాల్లో పెళ్లిళ్ల సీజన్ జోరందుకోనుంది. పంచాంగ కర్తల అంచనా ప్రకారం ఈ నెల రోజుల్లో తెలుగు రాష్ట్రాల్లో 10 వేలకు పైగా వివాహాలు, నిశ్చితార్థాలు జరిగే అవకాశం ఉంది. దీంతో ఫంక్షన్ హాళ్లు, కల్యాణ మండపాలు ఇప్పటికే పూర్తిగా బుక్ అయ్యాయి.

వ్యాపారాలకు ఊపు

శ్రావణ మాసం రావడంతో బంగారం, వస్త్ర, పూలు, డెకరేషన్, క్యాటరింగ్, ఫొటోగ్రఫీ, బ్యూటీ పార్లర్లు, ఈవెంట్ మేనేజ్‌మెంట్ రంగాల్లో డిమాండ్ భారీగా పెరిగింది. బంగారం ధరలు అధికంగా ఉన్నా పెళ్లి కోసం ఆభరణాలు కొనడానికి జనం ఆసక్తి చూపుతున్నారు. పాత బంగారం ఎక్స్ఛేంజ్ చేసి కొత్త ఆభరణాలు తీసుకునే వారితో దుకాణాల్లో రద్దీ కనిపిస్తోంది. పెళ్లి చీరలు, సంప్రదాయ దుస్తుల కోసం వస్త్ర షాపుల్లోనూ సందడి నెలకొంది. వివాహ డెకరేషన్ కోసం రూ.2 లక్షల నుంచి రూ.10 లక్షల వరకు ఖర్చు చేస్తున్నారు. కడియం, బెంగళూరు తదితర ప్రాంతాల నుంచి పూల దిగుమతి పెరిగింది. దీంతో పూల వ్యాపారులకు చేతినిండా పని దొరికింది.

లక్షల మందికి ఉపాధి

పెళ్లిళ్లతో పాటు గృహప్రవేశాలు, పూజలు, కొత్త వ్యాపారాలకు కూడా ఈ నెల శుభప్రదంగా భావిస్తున్నారు. కొత్త ఇళ్ల నిర్మాణాలు ప్రారంభించేందుకు చాలా మంది శ్రావణ ముహూర్తాలు చూస్తున్నారు. ప్రత్యక్షంగా, పరోక్షంగా లక్షల మందికి ఈ సీజన్ ఉపాధి కల్పించనుంది. క్యాటరింగ్ సిబ్బంది నుంచి డెకరేటర్లు, ఫొటోగ్రాఫర్ల వరకు అందరికీ పనులు పెరిగాయి. మొత్తంగా శ్రావణ మాసం రాకతో తెలుగు రాష్ట్రాల్లో వ్యాపార సందడి, శుభకార్యాల కోలాహలం నెలకొననుంది. నెల రోజుల పాటు పెళ్లి బాజాలు మోగనుండడంతో ప్రజలు ఆనందంగా ఈ సీజన్‌ను జరుపుకోడానికి సిద్ధమవు తున్నారు.

About The Author

Vision Andhra Telugu Daily

నిజాయితీ, నిష్పాక్షికత, విశ్వసనీయత అనే మూడు విలువలను ఆధారంగా చేసుకుని పనిచేస్తున్న వార్తా సంస్థ. సమాజంలో జరుగుతున్న ప్రతి ముఖ్యమైన పరిణామాన్ని వేగంగా, ఖచ్చితంగా, బాధ్యతాయుతంగా పాఠకులకు అందించడం మా ప్రధాన లక్ష్యం.