బెల్లంపల్లిలో ఎంవీఐ కార్యాలయం ఏర్పాటు చేయాలి

బెల్లంపల్లి  : జిల్లా కలెక్టర్‌ ఆధ్వర్యంలో సోమవారం నిర్వహించిన ప్రజావాణి కార్యక్రమంలో బెల్లంపల్లిలో మోటార్‌ వెహికిల్‌ ఇన్‌స్పెక్టర్‌ (ఎంవీఐ) కార్యాలయం ఏర్పాటు చేయాలని కోరుతూ సీనియర్‌ కాంగ్రెస్‌ పార్టీ బీసీ నాయకుడు కొలిపాక శ్రీనివాస్‌ వినతిపత్రం సమర్పించారు.బెల్లంపల్లి రెవెన్యూ డివిజన్‌గా ఏర్పడిన నేపథ్యంలో ప్రజలకు రవాణాశాఖ సేవలు స్థానికంగానే అందుబాటులోకి తీసుకురావాలని ఆయన కోరారు. డ్రైవింగ్‌ లైసెన్స్‌, వాహనాల రిజిస్ట్రేషన్‌ తదితర పనుల కోసం ప్రజలు ఇతర ప్రాంతాలకు వెళ్లాల్సి వస్తోందని, దీనివల్ల సమయం, డబ్బు వృథా అవుతున్నాయని తెలిపారు. బెల్లంపల్లిలో అనువైన ప్రభుత్వ స్థలాన్ని గుర్తించి ఎంవీఐ కార్యాలయం ఏర్పాటు చేయాలని కలెక్టర్‌ను కోరారు. టోల్‌గేట్లపై అభ్యంతరం జాతీయ రహదారులపై వాహనదారుల నుంచి వసూలు చేస్తున్న టోల్‌ రుసుముల వల్ల ప్రజలపై అదనపు ఆర్థిక భారం పడుతోందని శ్రీనివాస్‌ పేర్కొన్నారు. వాహనాల కొనుగోలు, పెట్రోల్‌, డీజిల్‌, రిజిస్ట్రేషన్‌, డ్రైవింగ్‌ లైసెన్స్‌ తదితరాల కోసం ప్రజలు ఇప్పటికే పలు రకాల పన్నులు, రుసుములు చెల్లిస్తున్నారని అన్నారు. ఈ నేపథ్యంలో టోల్‌గేట్లను ఎత్తివేసి వాహనదారులపై అదనపు భారం తగ్గించాలని కేంద్ర ప్రభుత్వాన్ని కోరారు. టోల్‌గేట్ల అంశాన్ని జిల్లా కలెక్టర్‌ ద్వారా కేంద్ర ప్రభుత్వం దృష్టికి తీసుకెళ్లాలని విజ్ఞప్తి చేశారు. బెల్లంపల్లి రెవెన్యూ డివిజన్‌ ప్రజల సౌకర్యార్థం రవాణాశాఖ సేవలను స్థానికంగానే అందుబాటులోకి తీసుకురావాలని, ఎంవీఐ కార్యాలయం ఏర్పాటుకు చర్యలు చేపట్టాలని కొలిపాక శ్రీనివాస్‌ కోరారు.