ఎందరో స్వాతంత్ర్య సమరయోధుల త్యాగఫలమే నేటి స్వేచ్ఛా భారతం: మేయర్ మూడ్ గణేష్

కొత్తగూడెం : కొత్తగా ఏర్పడిన కొత్తగూడెం కార్పొరేషన్ పరిధిలో 80వ స్వాతంత్ర్య దినోత్సవ వేడుకలు ఘనంగా నిర్వహించారు. కార్పొరేషన్ పరిధిలోని సుజాతనగర్, పాల్వంచ, కొత్తగూడెం డివిజన్లలో నగర మేయర్ మూడ్ గణేష్ అధ్యక్షతన జాతీయ పతాకావిష్కరణ కార్యక్రమాలు నిర్వహించారు. మొదట సుజాతనగర్, అనంతరం పాల్వంచ, చివరగా కొత్తగూడెం డివిజన్‌లో మేయర్ మూడ్ గణేష్ త్రివర్ణ పతాకాన్ని ఆవిష్కరించారు. ఈ సందర్భంగా జాతీయ జెండాకు వందనం చేసి, దేశ ప్రజలకు, నగర ప్రజలకు 80వ స్వాతంత్ర్య దినోత్సవ శుభాకాంక్షలు తెలిపారు. ఈ సందర్భంగా మేయర్ మూడ్ గణేష్ మాట్లాడుతూ.. నేడు మనం అనుభవిస్తున్న స్వేచ్ఛ, స్వాతంత్ర్యం ఎందరో మహానుభావుల త్యాగాల ఫలితమేనని అన్నారు. దేశ స్వేచ్ఛ కోసం ఎందరో స్వాతంత్ర్య సమరయోధులు తమ ప్రాణాలను సైతం తృణప్రాయంగా త్యాగం చేశారని, వారి త్యాగాల ఫలితంగానే నేడు మనం స్వేచ్ఛా వాతావరణంలో జీవిస్తున్నామని తెలిపారు.స్వాతంత్ర్య సమరయోధుల త్యాగాలను ప్రతి ఒక్కరూ స్మరించుకోవాల్సిన అవసరం ఉందన్నారు. దేశంలోని ప్రతి పౌరుడు తన బాధ్యతలను సక్రమంగా నిర్వర్తిస్తే దేశ పురోగతి సహజంగానే సాధ్యమవుతుందని పేర్కొన్నారు. తమ విధులను నిజాయితీగా నిర్వర్తించడమే స్వాతంత్ర్య సమరయోధులకు మనం అందించే నిజమైన గౌరవమని అన్నారు.

కొత్తగూడెం కార్పొరేషన్ నూతనంగా ఏర్పడిన అనంతరం మొదటిసారిగా స్వాతంత్ర్య దినోత్సవ వేడుకల్లో పాల్గొని జాతీయ పతాకాన్ని ఆవిష్కరించడం ఎంతో సంతోషంగా ఉందని మేయర్ తెలిపారు. నూతన కార్పొరేషన్‌ను అన్ని రంగాల్లో అభివృద్ధి చేయడానికి అధికారులు, ప్రజాప్రతినిధులు సమన్వయంతో పనిచేయాలని సూచించారు. అధికారులు తమకు అప్పగించిన బాధ్యతలను సమర్థవంతంగా నిర్వర్తిస్తూ కార్పొరేషన్ అభివృద్ధిలో భాగస్వాములు కావాలని కోరారు. నగర అభివృద్ధే ప్రధాన లక్ష్యంగా ప్రణాళికాబద్ధమైన కార్యాచరణ రూపొందించుకుని ముందుకు సాగుతామని మేయర్ స్పష్టం చేశారు. కార్పొరేషన్ పరిధిలోని 60 డివిజన్ల కార్పొరేటర్లు, అధికారులు, సిబ్బందితో సమన్వయం చేసుకుంటూ ప్రజలకు మెరుగైన మౌలిక సదుపాయాలు కల్పించేందుకు కృషి చేస్తామని తెలిపారు.ప్రజల అవసరాలను గుర్తించి ప్రాధాన్యతా క్రమంలో అభివృద్ధి పనులు చేపట్టాలని, ప్రతి డివిజన్‌లోని సమస్యలను పరిష్కరించే దిశగా సమష్టిగా పనిచేయాలని సూచించారు. నగర అభివృద్ధిలో ప్రజల భాగస్వామ్యాన్ని కూడా తీసుకుంటూ కొత్తగూడెం కార్పొరేషన్‌ను ఆదర్శ కార్పొరేషన్‌గా తీర్చిదిద్దేందుకు కృషి చేస్తామని పేర్కొన్నారు.స్వాతంత్ర్య దినోత్సవం సందర్భంగా జాతీయ జెండా ఆవిష్కరణ కార్యక్రమాలు దేశభక్తి వాతావరణంలో జరిగాయి. అధికారులు, ప్రజాప్రతినిధులు, కార్పొరేషన్ సిబ్బంది, స్థానికులు పాల్గొని జాతీయ పతాకానికి వందనం చేశారు. ఈ కార్యక్రమాల్లో కార్పొరేషన్ కమిషనర్ సుజాత, అసిస్టెంట్ కమిషనర్ విజయానంద్, కార్పొరేటర్లు, కార్పొరేషన్ అధికారులు, సిబ్బంది తదితరులు పాల్గొన్నారు.