ప్రజాస్వామ్య హక్కుల పరిరక్షణకు పోరాడాలి

 బెల్లంపల్లి, మంచిర్యాల జిల్లా: ప్రజాస్వామ్య హక్కులు, రాజ్యాంగ విలువల పరిరక్షణకు వామపక్ష శక్తులు ఐక్యంగా పోరాడాలని ఎంసీపీఐ(యు) జిల్లా కార్యదర్శి సబ్బని రాజేంద్రప్రసాద్ అన్నారు. పార్టీ వ్యవస్థాపకుడు, తెలంగాణ రైతాంగ సాయుధ పోరాట యోధుడు కామ్రేడ్ మద్ది కాయల ఓంకార్ 18వ వర్ధంతి సందర్భంగా శనివారం బెల్లంపల్లిలోని ఆయన స్మారక స్థూపం వద్ద పార్టీ నాయకులు ఘన నివాళులు అర్పించారు.ఈ సందర్భంగా ఎంసీపీఐ(యు) జిల్లా సహాయ కార్యదర్శి పసులేటి వెంకటేష్ అధ్యక్షతన ‘ప్రజాస్వామ్య హక్కులు–నియంతృత్వ ధోరణులు–వామపక్షాల కర్తవ్యం’ అనే అంశంపై సభ నిర్వహించారు. రాజేంద్రప్రసాద్, వెంకటేష్ మాట్లాడుతూ దేశంలో ఆకలి, నిరుద్యోగం, పేదరికం, కుల–మత వివక్ష వంటి సమస్యలు కొనసాగుతున్నాయని పేర్కొన్నారు. కేంద్ర, రాష్ట్ర ప్రభుత్వాల ప్రజా వ్యతిరేక విధానాలకు వ్యతిరేకంగా ప్రజా ఉద్యమాలను బలోపేతం చేయాల్సిన అవసరం ఉందన్నారు.మార్క్సిజం, అంబేద్కర్ ఆలోచనా విధానాల ఆధారంగా సామాజిక, ఆర్థిక సమానత్వం కోసం ఎంసీపీఐ(యు) పోరాడుతుందని తెలిపారు. కార్పొరేట్ అనుకూల విధానాలను వ్యతిరేకిస్తూ శ్రామిక, బహుజన వర్గాల హక్కుల పరిరక్షణకు కృషి చేస్తామని అన్నారు. కార్యక్రమంలో పట్టణ కార్యదర్శి ఆరెపల్లి రమేష్, మండల కార్యదర్శి సతీష్, మహిళా నాయకులు కాంపల్లి రాధ, దుర్గం లక్ష్మి, కామెర పద్మతో పాటు యువజన, విద్యార్థి నాయకులు నరేష్, శేఖర్, సాయి, రామ్, మహేష్, ఆకాష్, అరుణ్ తదితరులు పాల్గొన్నారు.