ఇంటికి తాళం.. సోషల్ మీడియాలో పోస్ట్ చేయకండి

సిద్దిపేట జిల్లా/గజ్వేల్ :దసరా పండుగ మరియు సెలవుల నేపథ్యంలో ప్రజలందరూ అప్రమత్తంగా ఉంటూ, సురక్షితంగా పండుగను జరుపుకోవాలని సిద్దిపేట జిల్లా గజ్వేల్ రూరల్ సిఐ డి. రవి రాజు సూచించారు. ప్రయాణాలు, పండుగ వేడుకల సమయంలో జరిగే నేరాలు, ప్రమాదాలను నివారించడానికి ప్రజలు క్రింది ముందస్తు జాగ్రత్తలు పాటించాలని కోరారు. ఊరికి వెళ్లేటప్పుడు ఇంటి తలుపులకు తాళాలు సరిగ్గా వేసి, విలువైన బంగారం, నగదును సురక్షిత ప్రాంతాల్లో ఉంచాలి. ఇంట్లో ఎవరూ లేని విషయాన్ని సోషల్ మీడియాలో పోస్ట్ చేయకూడదని, ఎక్కువ రోజులు దూరంగా ఉంటే స్థానిక పోలీసులకు లేదా పొరుగువారికి సమాచారం ఇవ్వాలన్నారు. ద్విచక్ర వాహనదారులు తప్పనిసరిగా హెల్మెట్, కారు ప్రయాణికులు సీటు బెల్ట్ ధరించాలని, మద్యం సేవించి వాహనం నడపడం, అతివేగం, డ్రైవింగ్ చేస్తూ మొబైల్ మాట్లాడడం వంటివి చేయకూడదన్నారు. ఆలయాలు, మార్కెట్లో మొబైల్స్, పర్సులు జాగ్రత్తగా చూసుకోవాలని, వాహనాలను కేవలం కేటాయించిన పార్కింగ్ స్థలాల్లోనే నిలిపి లాక్ చేయాలన్నారు. రద్దీ ప్రదేశాల్లో పిల్లలను ఒంటరిగా వదలకుండా జాగ్రత్త వహించాలన్నారు. ప్రజలందరూ పోలీసులకు సహకరించి, పండుగను ప్రశాంతంగా, ఆనందంగా జరుపుకోవాలని విజ్ఞప్తి చేశారు.