తెలంగాణ పోలీస్‌లో అన్ని విభాగాలకు ఫిట్‌కాప్ కార్యక్రమం విస్తరణ

హైదరాబాద్: తెలంగాణ పోలీస్ సిబ్బంది ఆరోగ్యం, సంక్షేమాన్ని మెరుగుపరిచి, విధి నిర్వహణలో మరింత సమర్థవంతంగా పనిచేసేలా చేయాలనే లక్ష్యంతో రాష్ట్రవ్యాప్తంగా ఫిట్‌కాప్ (FitCop) కార్యక్రమాన్ని విస్తరించేందుకు తెలంగాణ డీజీపీ శ్రీ సి.వి. ఆనంద్, ఐపీఎస్, ప్రత్యేక చర్యలు చేపట్టారు. ప్రస్తుతం ఉన్న ఈ కార్యక్రమాన్ని తెలంగాణ పోలీస్‌లోని అన్ని విభాగాలు, యూనిట్లకు విస్తరించే దిశగా కార్యాచరణ రూపొందిస్తున్నారు.

ఈ నేపథ్యంలో డీజీపీ సి.వి. ఆనంద్ యాప్ డెవలపర్లు, టెక్నికల్ టీమ్, పోలీస్ ఉన్నతాధికారులతో ప్రత్యేక సమావేశం నిర్వహించారు. ఫిట్‌కాప్ యాప్‌లో పొందుపరచాల్సిన ఆరోగ్య ప్రమాణాలు, అవసరమైన సాంకేతిక ఫీచర్లు, సిబ్బంది ఆరోగ్య వివరాల నమోదు, పర్యవేక్షణ విధానాలపై సమగ్రంగా సమీక్షించారు. ఈ కార్యక్రమానికి రానున్న పదేళ్ల పాటు పూర్తి ఆర్థిక సహకారం అందించేందుకు ఒక స్పాన్సర్ ముందుకు రావడం విశేషం.

90 వేల మంది పోలీసులకు ఆరోగ్య పరీక్షలు

తెలంగాణ పోలీస్ శాఖలో పనిచేస్తున్న సుమారు 90,000 మంది సిబ్బందికి ఈ కార్యక్రమం ద్వారా సమగ్ర ఆరోగ్య పరీక్షలు నిర్వహించనున్నారు. ఇందులో భాగంగా బాడీ మాస్ ఇండెక్స్ (BMI), ఎత్తు, బరువు, రక్తపోటు (BP), మధుమేహం (Diabetes) వంటి ముఖ్యమైన ఆరోగ్య పరీక్షలు నిర్వహించి, సంబంధిత వివరాలను ఫిట్‌కాప్ యాప్‌లో నమోదు చేస్తారు.

ఈ పరీక్షల ద్వారా అధిక ఆరోగ్య ముప్పు ఉన్న పోలీస్ సిబ్బందిని ముందుగానే గుర్తించి, వారికి అవసరమైన వైద్య సహాయం అందించేలా ప్రత్యేక వ్యవస్థను ఏర్పాటు చేయనున్నారు. ఇందుకోసం కాల్ సెంటర్ ద్వారా వైద్యులు సంబంధిత సిబ్బందికి ఫోన్ చేసి ఆరోగ్య పరిస్థితిని తెలుసుకోవడంతో పాటు, అవసరమైన వైద్య సలహాలు, సూచనలు అందిస్తారు. వారి ఆరోగ్య పరిస్థితిని నిరంతరం పర్యవేక్షించేలా చర్యలు తీసుకోనున్నారు.

మానసిక ఆరోగ్యానికి ప్రత్యేక ప్రాధాన్యత

కేవలం శారీరక ఆరోగ్యానికే పరిమితం కాకుండా పోలీస్ సిబ్బంది మానసిక ఆరోగ్య పరిరక్షణకు కూడా ఫిట్‌కాప్ కార్యక్రమంలో ప్రాధాన్యత ఇవ్వనున్నారు. విధి నిర్వహణలో ఎదురయ్యే ఒత్తిడి, పని భారం, ఇతర మానసిక సమస్యలను దృష్టిలో ఉంచుకుని అవసరమైన సహాయక చర్యలు చేపట్టనున్నారు.

అలాగే ప్రతి సిబ్బంది ఆరోగ్య పరిస్థితికి అనుగుణంగా వ్యక్తిగత ఆహార ప్రణాళికలు, వ్యాయామ సూచనలు అందించనున్నారు. ఆరోగ్యకరమైన ఆహారపు అలవాట్లు, క్రమబద్ధమైన వ్యాయామం, జీవనశైలి మార్పుల ద్వారా దీర్ఘకాలిక అనారోగ్య సమస్యలను తగ్గించడమే ఈ కార్యక్రమంలోని మరో ముఖ్య ఉద్దేశం.

40–45 రోజుల్లో ప్రారంభించేందుకు లక్ష్యం

ఫిట్‌కాప్ కార్యక్రమం అమలుకు సంబంధించి అవగాహన ఒప్పందం (MoU), యాప్ ప్రారంభం అనంతరం చేపట్టాల్సిన కార్యాచరణ ప్రణాళికపై డీజీపీ సమావేశంలో చర్చించారు. సాంకేతిక ఏర్పాట్లు, ఆరోగ్య పరీక్షల నిర్వహణ, వైద్యుల పర్యవేక్షణ, కాల్ సెంటర్ సేవలు వంటి అంశాలను సమన్వయం చేసి రానున్న 40–45 రోజుల్లో ఈ కార్యక్రమాన్ని ప్రారంభించాలని లక్ష్యంగా పెట్టుకున్నారు.

పోలీసుల ఆరోగ్యమే ప్రధాన లక్ష్యం

పోలీసులు నిరంతరం విధి నిర్వహణలో ఉండటంతో పాటు ప్రజల భద్రత, శాంతిభద్రతల పరిరక్షణలో కీలక పాత్ర పోషిస్తుంటారు. ఈ నేపథ్యంలో వారి ఆరోగ్యాన్ని కాపాడటం, అనారోగ్య సమస్యలను ముందుగానే గుర్తించడం, అవసరమైన వైద్య సహాయం అందించడం పోలీస్ శాఖ బాధ్యతగా భావించి ఫిట్‌కాప్ కార్యక్రమాన్ని విస్తరిస్తున్నారు.

ప్రతి పోలీస్ సిబ్బంది ఆరోగ్యకరమైన జీవనశైలిని అలవర్చుకుని శారీరకంగా, మానసికంగా దృఢంగా ఉండేలా చేయడంతో పాటు మరింత ఉత్సాహంగా, సమర్థవంతంగా విధులు నిర్వహించేలా తీర్చిదిద్దడమే ఫిట్‌కాప్ కార్యక్రమం ప్రధాన లక్ష్యమని డీజీపీ సి.వి. ఆనంద్ పేర్కొన్నారు.