అత్యవసర మెదడు శస్త్రచికిత్సతో చింతపల్లి మహిళకు పునర్జన్మ.

చింతపల్లి : రోడ్డు ప్రమాదంలో తలకు తీవ్ర గాయమైనప్పటికీ స్పృహ కోల్పోని ఓ మహిళ మెదడులో రక్తపు గడ్డ ఏర్పడి ప్రాణాపాయ పరిస్థితిని ఎదుర్కొన్నారు. మెదడుపై తీవ్ర ఒత్తిడి కలిగిస్తూ మధ్యరేఖ నుంచి పక్కకు నెట్టిన రక్తపు గడ్డను మలక్‌పేట యశోదా సూపర్ స్పెషాలిటీ ఆసుపత్రి వైద్యులు అత్యవసర శస్త్రచికిత్స ద్వారా తొలగించి ఆమె ప్రాణాలను కాపాడారు.చింతపల్లి మండలం నసర్లపల్లికి చెందిన జల్లాల మల్లమ్మ (49) కు వైద్యులు అందించిన ఈ చికిత్స వైద్యరంగంలో మరోసారి సకాలంలో స్పందన ప్రాధాన్యతను చాటిచెప్పింది.
ప్రమాదం జరిగినా స్పృహ కోల్పోలేదు
నసర్లపల్లి గ్రామానికి చెందిన జల్లాల మల్లమ్మ 2026 సెప్టెంబర్ 16న మధ్యాహ్నం సుమారు 3.30 గంటల సమయంలో ద్విచక్ర వాహనంపై వెనుక కూర్చుని ప్రయాణిస్తుండగా చింతపల్లి సమీపంలో మరో ద్విచక్ర వాహనం ఢీకొట్టింది.ఈ ప్రమాదంలో ఆమె తల, ముఖం,కుడి చేతికి గాయాలయ్యాయి.ఒకసారి వాంతి అయినప్పటికీ స్పృహ కోల్పోవడం,ఫిట్స్ రావడం, చెవి,ముక్కు నుంచి రక్తస్రావం వంటి లక్షణాలు కనిపించలేదు.మొదట స్థానిక ఆసుపత్రిలో నిర్వహించిన సీటీ స్కాన్‌లో మెదడులో రక్తపు గడ్డ ఉన్నట్లు గుర్తించడంతో మెరుగైన చికిత్స కోసం మలక్‌పేట యశోదా ఆసుపత్రికి తరలించారు.
మెదడుపై తీవ్ర ఒత్తిడి, అత్యవసర శస్త్రచికిత్స
ఆసుపత్రిలో నిర్వహించిన వైద్య పరీక్షలు, సీటీ స్కాన్‌లో మెదడుకు ఎడమవైపు ఫ్రంటల్ ప్రాంతంలో ఎక్స్‌ట్రాడ్యూరల్ హెమటోమా (రక్తపు గడ్డ) ఏర్పడి మెదడుపై తీవ్ర ఒత్తిడి కలిగిస్తున్నట్లు వైద్యులు గుర్తించారు. అంతేకాకుండా మెదడు మధ్యరేఖ పక్కకు జరగడంతో పాటు సబ్‌ఫాల్సిన్ హెర్నియేషన్ పరిస్థితి ఏర్పడినట్లు నిర్ధారించారు. ఎడమవైపు పెరైటల్ పుర్రె ఎముకలో సన్నని పగులు కూడా గుర్తించారు.
దీంతో సీనియర్ కన్సల్టెంట్ న్యూరో సర్జన్ డాక్టర్ శ్రీనివాస్ బొట్ల నేతృత్వంలోని వైద్య బృందం సెప్టెంబర్ 17న జనరల్ అనస్థీషియాలో అత్యవసరంగా లెఫ్ట్ టెరియోనల్ క్రేనియోటమీ శస్త్రచికిత్స నిర్వహించింది. పుర్రె ఎముకలో కొంత భాగాన్ని తెరిచి రక్తపు గడ్డను తొలగించారు.అనంతరం ఎముక భాగాన్ని టైటానియం ప్లేట్లు,స్క్రూల సహాయంతో తిరిగి అమర్చారు.
ఊపిరితిత్తుల సమస్యనూ అధిగమించి.
శస్త్రచికిత్స అనంతరం మల్లమ్మను ఐసీయూకు తరలించి వెంటిలేటర్‌పై చికిత్స అందించారు.ఈ క్రమంలో కుడి ఊపిరితిత్తి చుట్టూ గాలి చేరి ఊపిరితిత్తి పాక్షికంగా ముడుచుకుపోయింది. పల్మనాలజీ నిపుణుల సూచన మేరకు ఛాతీలో ఇంటర్‌కోస్టల్ డ్రెయిన్ అమర్చి చికిత్స అందించారు.పరిస్థితి మెరుగుపడిన తర్వాత డ్రెయిన్ తొలగించారు. తదుపరి నిర్వహించిన సీటీ స్కాన్‌లో మెదడుపై ఒత్తిడి పూర్తిగా తగ్గడంతో పాటు మిడ్‌లైన్ షిఫ్ట్ కూడా సరిదిద్దబడినట్లు వైద్యులు నిర్ధారించారు.
పూర్తిగా కోలుకుని ఆసుపత్రి నుంచి డిశ్చార్జ్.
నిరంతర వైద్య పర్యవేక్షణ, అవసరమైన మందులు, నిపుణుల చికిత్సతో మల్లమ్మ ఆరోగ్య పరిస్థితి మెరుగుపడింది.సెప్టెంబర్ 22న ఆసుపత్రి నుంచి డిశ్చార్జ్ చేసే సమయానికి ఆమె పూర్తిగా స్పృహతో,పరిసరాలను గుర్తిస్తూ,వైద్యుల సూచనలకు స్పందించారు.ఆమె గ్లాస్గో కోమా స్కేల్ స్కోర్ 12/15 నుంచి 15/15కు చేరింది.
తలకు గాయమైతే నిర్లక్ష్యం చేయొద్దు: డాక్టర్ శ్రీనివాస్ బొట్ల.
ప్రమాదం జరిగిన తర్వాత స్పృహ కోల్పోకపోయినా మెదడులో అంతర్గత రక్తస్రావం ఉండే అవకాశముందని, తలకు గాయమైన ప్రతి ఒక్కరూ వైద్యులను సంప్రదించాలని డాక్టర్ శ్రీనివాస్ బొట్ల సూచించారు. వైద్యులు అవసరమని భావించినప్పుడు సీటీ స్కాన్ చేయించుకోవాలని తెలిపారు. మగత,ఫిట్స్,తరచూ వాంతులు,తీవ్రమైన తలనొప్పి వంటి లక్షణాలను నిర్లక్ష్యం చేయకూడదన్నారు.
మలక్‌పేట్ యశోదా సూపర్ స్పెషాలిటీ ఆసుపత్రిలో 24 గంటల అత్యవసర వైద్య సేవలు,న్యూరోసర్జరీ,క్రిటికల్ కేర్ సేవలు అందుబాటులో ఉన్నాయని ఆసుపత్రి డైరెక్టర్ గోరుకంటి పవన్,యూనిట్ హెడ్ కె.శ్రీనివాస్ రెడ్డి, అసోసియేట్ వైస్ ప్రెసిడెంట్ శ్రీనివాస్ చిదుర తెలిపారు. ద్విచక్ర వాహనం నడిపేవారితో పాటు వెనుక కూర్చునేవారు కూడా తప్పనిసరిగా హెల్మెట్ ధరించాలని సూచించారు.
ఈ ఘటన తలకు గాయమైనప్పుడు పైకి సాధారణంగా కనిపించినా అంతర్గతంగా తీవ్రమైన సమస్యలు ఉండవచ్చని, సకాలంలో వైద్య పరీక్షలు ప్రాణాలను కాపాడగలవని స్పష్టం చేస్తోంది.