మా చావుకు కోడలు కారణం కాదు - సూసైడ్ నోట్ లో ముగ్గురి ఆవేదన:

మేడ్చల్ మల్కాజ్గిరి జిల్లా : నానక్‌రామ్‌గూడ సమీపంలోని గౌలిదొడ్డిలో విషాద ఘటన చోటుచేసుకుంది. ఒకే కుటుంబానికి చెందిన ముగ్గురు ఆత్మహత్య చేసుకున్నారు. పాలమూరు జిల్లా అచ్చంపేట మండలం తల్లచెరువు గ్రామానికి చెందిన బత్తుల మర్రెడ్డి (65), ఆయన భార్య భారతి (60), కుమారుడు నిశాంత్‌రెడ్డి (38) పదేళ్లుగా నానక్‌రామ్‌గూడ ప్రాంతంలో ఉంటున్నారు. మర్రెడ్డి రిటైర్డ్ లెక్చరర్, ఆయన భార్య భారతి రిటైర్డ్ బ్యాంకు మేనేజర్. జేఈఈ అడ్వాన్స్‌డ్‌లో 17వ ర్యాంకు సాధించిన నిశాంత్‌రెడ్డి ఐఐటీ చదువు పూర్తి చేసి, ఓ ప్రముఖ ఐటీ కంపెనీలో సాఫ్ట్‌వేర్ ఉద్యోగం చేస్తున్నారు. ఏడాది క్రితం నుంచి కుటుంబంలో చిన్న చిన్న గొడవలు రావడంతో మర్రెడ్డి కుటుంబం నానక్‌రామ్‌గూడ నుంచి గౌలిదొడ్డిలోని ఒక గేటెడ్ కమ్యూనిటీకి మారారు. నాలుగు రోజుల క్రితం మర్రెడ్డి కోడలు తేజస్వినీరెడ్డి తన కుమారుడు ఆరణ్‌తేజ్‌రెడ్డిని తీసుకుని మియాపూర్‌లోని తన అన్న ఇంటికి వెళ్లారు. అప్పటి నుంచి ఇంట్లో మర్రెడ్డి, ఆయన భార్య భారతి, కుమారుడు నిశాంత్‌రెడ్డి ఉంటున్నారు. శనివారం రాత్రి కుటుంబ సమస్యలు, ఆరోగ్య సమస్యలతో ఆత్మహత్య చేసుకుంటున్నట్లు లేఖ రాసి ముగ్గురూ ప్రాణాలు తీసుకున్నారు. మర్రెడ్డి తెలుగులో రాసిన ఆ లేఖలో తమ చావుకు కోడలు తేజస్వినీరెడ్డికి ఎలాంటి సంబంధమూ లేదని, ఆరోగ్య సమస్యల కారణంగానే ఈ నిర్ణయం తీసుకున్నామని రాసినట్టు పోలీసులు తెలిపారు. మనవడు ఆరణ్‌తేజ్‌రెడ్డిని చక్కగా పెంచాలని కోడలిని కోరుతూ రాసిన లేఖలో కింద ముగ్గురి సంతకాలూ ఉన్నాయని వారు వెల్లడించారు. పదేళ్ల క్రితం ఐఐటీలో సీటు రాలేదని చిన్నకొడుకు ఆత్మహత్య చేసుకుని చనిపోయినట్టు కుటుంబ సభ్యులు తెలిపారు. పోలీసులు కేసు నమోదు చేసి దర్యాప్తు చేస్తున్నారు.