సికింద్రాబాద్ రైల్వే స్టేషన్ లో సంచలనం

 తెలంగాణ స్టేట్ బ్యూరో :

సికింద్రాబాద్ రైల్వే నిలయం వద్ద ఈరోజు ఉద్రిక్త పరిస్థితులు నెలకొన్నాయి. నవంబర్ 1వ తేదీన ఢిల్లీలో జరిగే కాంగ్రెస్ పార్టీ భారీ నిరసనకు హాజరయ్యేందుకు రైళ్లు కేటాయించకుండా కేంద్రం అడ్డుకుంటోందని ఆరోపిస్తూ, టీపీసీసీ ఆధ్వర్యంలో కాంగ్రెస్ పార్టీ మెరుపు ధర్నా నిర్వహించింది.

ఈ నిరసనకు పీసీసీ అధ్యక్షుడు మహేష్ కుమార్ గౌడ్, రాష్ట్ర మంత్రి పొన్నం ప్రభాకర్ స్వయంగా నేతృత్వం వహించారు. దీంతో రైల్వే స్టేషన్ ప్రాంగణం కాంగ్రెస్ కార్యకర్తలతో నిండిపోయి, కొద్దిసేపు పూర్తిగా స్తంభించిపోయింది.

నగరం నలుమూలల నుండి భారీ తరలింపు - GM కార్యాలయం ముందు బైఠాయింపు

ఉదయం నుంచే నగరం నలుమూలల నుండి కాంగ్రెస్ కార్యకర్తలు భారీగా సికింద్రాబాద్ రైల్వే నిలయానికి తరలివచ్చారు.

కార్యకర్తలంతా ఒక్కసారిగా రైల్వే నిలయంలోని GM కార్యాలయం ముందు బయట బైఠాయించి నిరసన చేపట్టారు. చేతుల్లో ప్లకార్డులు, నోట నినాదాలతో రైల్వే ప్రాంగణం మారుమోగిపోయింది.

ధర్నాలో ఎమ్మెల్యేలు నవీన్ యాదవ్, శ్రీ గణేష్, డీసీసీ అధ్యక్షులు మోత రోహిత్, దీపక్ జాన్ తో పాటు ఇతర ముఖ్య నేతలు, అధికారులు పెద్ద సంఖ్యలో పాల్గొన్నారు.

మోదీ ప్రభుత్వానికి వ్యతిరేకంగా, రైల్వే అధికారుల తీరుకు వ్యతిరేకంగా కార్యకర్తలు గట్టిగా నినాదాలు చేశారు. రైల్వే పోలీసులు, సిబ్బంది ఏం చేయాలో తెలియక సందిగ్ధంలో పడ్డారు.

తోపులాటలో కిందపడ్డ మంత్రి పొన్నం, పీసీసీ చీఫ్ మహేష్ కుమార్ గౌడ్

నిరసన తీవ్ర స్థాయికి చేరుకున్న సమయంలో పోలీసులు కార్యకర్తలను చెదరగొట్టేందుకు ప్రయత్నించారు. దీంతో తోపులాట జరిగింది.

ఈ తోపులాటలో మంత్రి పొన్నం ప్రభాకర్, పీసీసీ చీఫ్ మహేష్ కుమార్ గౌడ్ కిందపడ్డారు. నేతలు కిందపడటంతో కాంగ్రెస్ కార్యకర్తలు మరింత ఆగ్రహంతో ఊగిపోయారు.

ఈ క్రమంలో మంత్రి పొన్నం ప్రభాకర్‌కు, ఖమ్మం ఎంపీ రఘురాం రెడ్డికి అస్వస్థత కూడా కలిగింది. వారు నిలబడలేక ఇబ్బంది పడటంతో, పార్టీ నేతలు వెంటనే వారికి ప్రథమ చికిత్స అందించి, సేదదీర్చే ప్రయత్నం చేశారు. ఈ ఘటనతో ధర్నా స్థలంలో కొద్దిసేపు ఉద్రిక్తత మరింత పెరిగింది.

పోలీసుల అదుపులోకి కాంగ్రెస్ నేతలు - మార్కెట్ పిఎస్ కు తరలింపు

పరిస్థితి చేయిదాటిపోతుందని గ్రహించిన పోలీసులు చివరకు కఠినంగా వ్యవహరించారు. నిరసనలో పాల్గొన్న ప్రధాన నేతలను అదుపులోకి తీసుకున్నారు.

రైల్వే నిలయం వద్ద అరెస్ట్ చేసిన పీసీసీ చీఫ్ మహేష్ కుమార్ గౌడ్, మంత్రి పొన్నం ప్రభాకర్, రాజ్యసభ సభ్యులు వేం నరేందర్ రెడ్డి, అనిల్ కుమార్ యాదవ్, ఎమ్మెల్యేలు నవీన్ యాదవ్, శ్రీ గణేష్* లను పోలీసులు వాహనాల్లో సికింద్రాబాద్ మార్కెట్ పోలీస్ స్టేషన్ కు తరలించారు.

అరెస్ట్ సమయంలో కూడా నేతలు మోదీకి వ్యతిరేకంగా నినాదాలు చేస్తూనే ఉన్నారు. పోలీసులు, కాంగ్రెస్ నేతల మధ్య స్వల్ప వాగ్వాదం కూడా జరిగింది.

రైల్వే స్టేషన్ లో ట్రాఫిక్ స్తంభన - ప్రయాణికులు ఇబ్బందులు

అకస్మాత్తుగా జరిగిన ఈ మెరుపు ధర్నాతో సికింద్రాబాద్ రైల్వే నిలయంలో ప్రయాణికుల రాకపోకలు కొద్దిసేపు స్తంభించిపోయాయి. స్టేషన్ ముందు రోడ్డుపై భారీగా ట్రాఫిక్ నిలిచిపోయింది. పోలీసులు అదనపు బలగాలను మోహరించి, పరిస్థితిని అదుపులోకి తెచ్చేందుకు ప్రయత్నించారు.

మొత్తంగా, సికింద్రాబాద్ రైల్వే నిలయం ముందు జరిగిన ఈ మెరుపు ధర్నా రాష్ట్ర రాజకీయాల్లో పెను సంచలనంగా మారింది. పీసీసీ చీఫ్, మంత్రి సహా కీలక నేతల అరెస్ట్ తో కాంగ్రెస్ వర్సెస్ కేంద్రం ఘర్షణ మరో స్థాయికి చేరుకుంది. ఈ కార్యక్రమంలో జూబ్లీహిల్స్ ఎమ్మెల్యే నవీన్ యాదవ్ పాల్గొన్నారు.