వాహనదారులకు శుభవార్త - ఇంటి నుంచే వాహన రిజిస్ట్రేషన్ ప్రక్రియ!

వాహన్ పోర్టల్ ద్వారా లైసెన్స్, బదిలీ, చిరునామా మార్పు సేవలు - డీటీఓ ఇమ్రాన్ అహ్మద్

నాగర్ కర్నూల్ : ఆర్టీఏ కార్యాలయాల చుట్టూ తిరగాల్సిన అవసరం లేకుండా వాహనదారులకు ఇంటి నుంచే ఆన్‌లైన్ సేవలు అందుబాటులోకి వచ్చాయని నాగర్‌కర్నూల్ జిల్లా డీటీఓ ఇమ్రాన్ అహ్మద్ తెలిపారు.వాహన్ పోర్టల్ ద్వారా పలు ఆర్టీఏ సేవలు ఆన్‌లైన్‌లో అందుబాటులోకి వచ్చాయని ఆయన పేర్కొన్నారు. డ్రైవింగ్ లైసెన్స్ సేవలకు ఇంటి నుంచే దరఖాస్తు చేసుకునే అవకాశం ఉందని, ఈ-కేవైసీ ద్వారా సేవలు మరింత సులభతరం అయ్యాయని తెలిపారు.వాహనాల అద్దె, యాజమాన్య బదిలీ సేవలు ఆన్‌లైన్‌లోనే పొందవచ్చని, వాహన రిజిస్ట్రేషన్‌లో చిరునామా మార్పునకు కూడా ఆన్‌లైన్ సదుపాయం ఉందని వివరించారు. ఆధార్ ఓటీపీ, ఫేస్ రికగ్నిషన్ ద్వారా ఇంటి నుంచే దరఖాస్తు చేసుకోవచ్చని చెప్పారు.

కొన్ని ప్రత్యేక సేవలకు మాత్రమే ఆర్టీఏ కార్యాలయానికి రావాల్సి ఉంటుందని, ఈ డిజిటల్ సేవల ద్వారా సమయం, ప్రయాణ ఖర్చులు ఆదా అవుతాయని డీటీఓ తెలిపారు. వాహనదారులు ఆన్‌లైన్ సేవలను సద్వినియోగం చేసుకోవాలని డీటీఓ ఇమ్రాన్ అహ్మద్ సూచించారు.

About The Author

Vision Andhra Telugu Daily

నిజాయితీ, నిష్పాక్షికత, విశ్వసనీయత అనే మూడు విలువలను ఆధారంగా చేసుకుని పనిచేస్తున్న వార్తా సంస్థ. సమాజంలో జరుగుతున్న ప్రతి ముఖ్యమైన పరిణామాన్ని వేగంగా, ఖచ్చితంగా, బాధ్యతాయుతంగా పాఠకులకు అందించడం మా ప్రధాన లక్ష్యం.