మోడ్రన్ ఇక్రా పాఠశాలలో హెచ్‌పీవీ టీకాలపై అవగాహన

కొత్తగూడెం  : రామవరం ఎస్‌సీబీ నగర్‌లోని మోడ్రన్ ఇఖ్రా ప్రైవేట్ పాఠశాలలో గురువారం విద్యార్థినులకు హెచ్‌పీవీ (హ్యూమన్ పాపిలోమా వైరస్‌) టీకాపై అవగాహన కార్యక్రమం నిర్వహించి, అనంతరం టీకాలు వేశారు. ఈ సందర్భంగా విద్యార్థినులకు హెచ్‌పీవీ టీకా ప్రాధాన్యత, ఆరోగ్య పరిరక్షణలో దాని ఉపయోగం, టీకాలు వేయించుకోవడం వల్ల కలిగే ప్రయోజనాలపై ఆరోగ్య సిబ్బంది అవగాహన కల్పించారు. విద్యార్థినులు తమ ఆరోగ్యం పట్ల జాగ్రత్తగా ఉండాలని, తల్లిదండ్రులు కూడా టీకాల ప్రాధాన్యతను గుర్తించి అర్హత ఉన్న పిల్లలకు సకాలంలో టీకాలు వేయించాలని సూచించారు. అలాగే పాఠశాలలోని 10, 16 సంవత్సరాల వయస్సు కలిగిన విద్యార్థులు, విద్యార్థినులకు టీడీ (టెటనస్‌, డిఫ్తీరియా) టీకాలు వేశారు. వయస్సుకు అనుగుణంగా అవసరమైన టీకాలు సకాలంలో తీసుకోవడం ద్వారా ఆరోగ్యాన్ని కాపాడుకోవచ్చని ఆరోగ్య సిబ్బంది తెలిపారు. ఈ కార్యక్రమంలో పాఠశాల కరస్పాండెంట్ ఎస్‌.కె. అబ్దుల్ బసీద్ పాల్గొని కార్యక్రమానికి సహకరించారు. విద్యార్థుల ఆరోగ్య పరిరక్షణకు పాఠశాల స్థాయిలో ఇలాంటి అవగాహన, టీకాల కార్యక్రమాలు నిర్వహించడం అవసరమని పేర్కొన్నారు. కార్యక్రమంలో వి. శ్రీనివాసరావు (పబ్లిక్ హెల్త్ మేనేజర్/పీహెచ్‌ఎం), పి. శ్రీలక్ష్మి, కె. రాజేశ్వరి (ఏఎన్‌ఎంలు) పాల్గొన్నారు. విద్యార్థులకు అవసరమైన అవగాహన కల్పించడంతో పాటు టీకాల కార్యక్రమాన్ని నిర్వహించారు.విద్యార్థుల ఆరోగ్య రక్షణలో టీకాలు కీలక పాత్ర పోషిస్తాయని, అర్హత కలిగిన ప్రతి విద్యార్థి ఆరోగ్య శాఖ సూచనల మేరకు అవసరమైన టీకాలను సకాలంలో తీసుకోవాలని ఈ సందర్భంగా ఆరోగ్య సిబ్బంది సూచించారు.