సెప్టెంబర్‌ 17పై సమరశంఖం!

పెన్‌పహాడ్‌,  (సూర్యాపేట ):  తెలంగాణ చరిత్రలో కీలకమైన సెప్టెంబర్‌ 17ను రాష్ట్ర ప్రభుత్వం అధికారికంగా తెలంగాణ విమోచన దినోత్సవంగా నిర్వహించాలని బీజేపీ పెన్‌పహాడ్‌ మండల శాఖ డిమాండ్‌ చేసింది. ఈ మేరకు మండల తహసీల్దార్‌ కు బుధవారం వినతిపత్రం సమర్పించి తమ డిమాండ్‌ను ప్రభుత్వ దృష్టికి తీసుకెళ్లాలని కోరారు.నిజాం పాలన నుంచి విముక్తి పొందిన చారిత్రక ఘట్టాన్ని అధికారికంగా గుర్తించాల్సిన అవసరం ఉందని బీజేపీ పేర్కొంది. 1947 ఆగస్టు 15న దేశానికి స్వాతంత్య్రం వచ్చినప్పటికీ అప్పటి హైదరాబాద్‌ సంస్థానం నిజాం పాలనలోనే కొనసాగిందని, 1948 సెప్టెంబర్‌ 17న విముక్తి లభించిందని వినతిపత్రంలో వివరించింది. సర్దార్‌ వల్లభభాయ్‌ పటేల్‌ నేతృత్వంలోని ‘ఆపరేషన్‌ పోలో’ అనంతరం ఈ ప్రాంతంలో త్రివర్ణ పతాకం ఎగిరిందని పేర్కొన్నారు.పక్క రాష్ట్రాల్లో అధికారిక వేడుకలు.. తెలంగాణలోనూ అదే గుర్తింపు కావాలి అనే డిమాండ్‌ను బీజేపీ ముందుకు తెచ్చింది. హైదరాబాద్‌ సంస్థానం నుంచి విడిపోయి మహారాష్ట్ర, కర్ణాటకలో కలిసిన ప్రాంతాల్లో సెప్టెంబర్‌ 17ను ఆయా రాష్ట్ర ప్రభుత్వాలు అధికారికంగా ‘విమోచన దినోత్సవం’గా నిర్వహిస్తున్నాయని వినతిపత్రంలో పేర్కొన్నారు. తెలంగాణలోనూ సెప్టెంబర్‌ 17ను అధికారికంగా నిర్వహించాలని కోరారు.పెన్‌పహాడ్‌ నుంచే ప్రభుత్వానికి స్పష్టమైన విజ్ఞప్తి చేశారు. మండల పరిధిలోని అన్ని ప్రభుత్వ కార్యాలయాలు, పాఠశాలల్లో సెప్టెంబర్‌ 17న జాతీయ జెండాను ఆవిష్కరించి అధికారిక కార్యక్రమాలు నిర్వహించేలా తగిన చర్యలు తీసుకోవాలని తహసీల్దార్‌ను కోరారు. తమ ప్రజా డిమాండ్‌ను ప్రభుత్వం దృష్టికి తీసుకెళ్లాలని విజ్ఞప్తి చేశారు. ఈ కార్యక్రమంలో  మండల అధ్యక్షులు తాళ్లపల్లి మధు,అన్నారం బ్రిడ్జి గ్రామ సర్పంచ్ సుందరి రామారావు,మండల జనరల్ సెక్రటరీ గుడపురి శ్రీనివాస్,యాదయ్య,ఇసుకపల్లి రవి, గార్ని వెంకన్న తదితరులు పాల్గొన్నారు.