ఇంటర్వెన్షనల్ రేడియాలజీ​ఆధునిక వైద్యంలో పిన్‌హోల్ విప్లవం

నిజామాబాదు,: ఇంటర్వెన్షనల్ రేడియాలజీ (ఐఆర్) వైద్య రంగంలో ఒక మైలురాయి లాంటిదని సికింద్రాబాద్ యశోద హాస్పిటల్స్‌కు చెందిన ఇంటర్వెన్షనల్ అండ్ న్యూరో రేడియాలజిస్ట్ డాక్టర్ మనీషా జోషి గురువారం నిజామాబాద్‌ లో నిర్వహించిన విలేకరుల సమావేశంలో పేర్కొన్నారు. పెద్ద కోతలు పెట్టే ఓపెన్ సర్జరీల అవసరం లేకుండా... ఎక్స్-రేలు, ఆంజియోగ్రఫీ, సీటీ స్కాన్‌లు, అల్ట్రాసౌండ్ ,ఎం ఆర్ ఐ వంటి అధునాతన ఇమేజింగ్ సాంకేతికతల సహాయంతో పిన్‌హోల్ (చిన్న రంధ్రం) ద్వారా సంక్లిష్టమైన రక్తనాళాల సమస్యలకు అత్యంత ఖచ్చితత్వంతో ఎలా చికిత్స చేయవచ్చో ఆమె వివరించారు. ​మెకానికల్ థ్రాంబెక్టమీ, ఆంజియోప్లాస్టీ, స్టెంటింగ్ వంటి ప్రక్రియలు మెదడులోని రక్తనాళాల అడ్డంకులను తొలగించి తీవ్రమైన బ్రెయిన్ స్ట్రోక్‌లను సమర్థవంతంగా నయం చేస్తాయని, అలాగే అధునాతన కాయిలింగ్ విధానాల ద్వారా ప్రాణాంతకమైన అన్యూరిజమ్‌లను పునరుద్ధరించి మెదడులో రక్తస్రావాన్ని నివారించవచ్చని తెలిపారు. తీవ్రమైన గుండె, నరాల అత్యవసర సమస్యలతో పాటు, క్యాన్సర్ కణితులు, గర్భాశయ ఫైబ్రాయిడ్లు, ప్రోస్టేట్ గ్రంథి వాపు, థైరాయిడ్ సమస్యలకు కుట్లు లేని అధునాతన చికిత్సలను ఆధునిక ఐ ఆర్ అందిస్తోందని ఆమె పేర్కొన్నారు. ​జనవరి 16, 1964న ఒక వృద్ధురాలి కాలు తొలగించకుండా కాపాడేందుకు ప్రపంచంలోనే తొలి ఆంజియోప్లాస్టీని నిర్వహించిన ప్రముఖ అమెరికన్ రేడియాలజిస్ట్ డాక్టర్ చార్లెస్ థియోడోర్ డాటర్‌ను ఈ రంగానికి పితామహుడిగా డాక్టర్ మనీషా జోషి గుర్తుచేసుకున్నారు. ప్రస్తుతం ఈ విభాగం ఎంతో విస్తరించిందని చెబుతూ... సాంప్రదాయ శస్త్రచికిత్సలకు ప్రత్యామ్నాయంగా అందుబాటులో ఉన్న ఈ ఆధునిక, అతి తక్కువ కోతతో కూడిన చికిత్సల కోసం స్పెషలిస్ట్ ఇంటర్వెన్షనల్ రేడియాలజిస్టులను సంప్రదించాలని ఆమె రోగులకు సూచించారు. ఈ సమావేశంలో యశోద ఆసుపత్రి మార్కెటింగ్ మేనేజర్ శ్రీరామ్ సురేష్ తదితరులు పాల్గొన్నారు