చలో నర్సాపూర్ ధర్నాను విజయవంతం చేద్దాం.

*బాధ్యులపై కఠిన చర్యలు తీసుకోవాలి 

*అఖిల భారత విశ్వకర్మ మహాసభ మెదక్ జిల్లా కమిటీ డిమాండ్ 

రేగోడ్ (మెదక్ ) : మెదక్ జిల్లా నర్సాపూర్ పట్టణం చింతకుంట గేట్ వద్ద సుమారు 30 సంవత్సరాల క్రితం ప్రతిష్ఠించిన శ్రీ విరాట్ పోతులూరి వీరబ్రహ్మేంద్ర స్వామి వారి విగ్రహాన్ని  గుర్తుతెలియని వ్యక్తులు ధ్వంసం చేయడాన్ని నిరసిస్తూ అఖిల భారత విశ్వకర్మ మహాసభ రాష్ట్ర అధ్యక్షుడు కౌలే జగన్నాథం చారి ఆదేశాల మేరకు మెదక్ జిల్లా కమిటీ ఆధ్వర్యంలో భారీ నిరసన కార్యక్రమానికి పిలుపునిచ్చారు. వీరబ్రహ్మేంద్ర స్వామి విగ్రహ ధ్వంసం పట్ల స్థానిక విశ్వకర్మ సంఘం నాయకులు, హిందూ సంఘాల ప్రతినిధులు తీవ్ర ఆవేదన వ్యక్తం చేశారు. ధ్వంసమైన విగ్రహాన్ని తిరిగి పునఃప్రతిష్ఠించాలని డిమాండ్ చేస్తూ రేపు 14-11-2026న చలో నర్సాపూర్ కార్యక్రమాన్ని నిర్వహించేందుకు నిర్ణయించారు.ఈ కార్యక్రమానికి తెలంగాణ రాష్ట్రవ్యాప్తంగా ఉన్న విశ్వకర్మ జాతీయులు, హిందూ బంధువులు, అన్ని రాజకీయ పార్టీల నాయకులు, వివిధ కుల సంఘాల నాయకులు, ప్రజా సంఘాల ప్రతినిధులు పెద్ద సంఖ్యలో తరలిరావాలని నిర్వాహకులు కోరారు. సుమారు 10 వేల మందితో భారీ నిరసన కార్యక్రమం నిర్వహించేందుకు ఏర్పాట్లు చేస్తున్నట్లు మెదక్ జిల్లా అధ్యక్షుడు జనార్దన్ చారి,ప్రధాన కార్యదర్శి నాగభూషణం చారి తెలిపారు.విగ్రహ పునఃప్రతిష్ఠ కార్యక్రమానికి ప్రతి ఒక్కరూ మద్దతుగా నిలిచి చలో నర్సాపూర్ కార్యక్రమాన్ని విజయవంతం చేయాలని స్థానిక విశ్వకర్మ సంఘం నాయకులు,హిందూ సంఘాల నాయకులు విజ్ఞప్తి చేశారు.