మల్హర్ మండలానికి 382 నూతన చేయూత పెన్షన్లు మంజూరు

మల్హర్ రావు : జయశంకర్ భూపాలపల్లి జిల్లా మల్హర్ రావు మండలానికి నూతనంగా 382 చేయూత పెన్షన్లు మంజూరయ్యాయి. మండలంలోని 15 గ్రామ పంచాయతీల పరిధిలో వివిధ కేటగిరీలకు చెందిన అర్హులైన లబ్ధిదారులకు ప్రభుత్వం కొత్తగా పెన్షన్లు కేటాయించింది. మంజూరైన పెన్షన్లలో 78 దివ్యాంగుల పెన్షన్లు, 14 వివాహిత ఒంటరి మహిళల పెన్షన్లు, 5 అవివాహిత ఒంటరి మహిళల పెన్షన్లు, 26 గీత కార్మికుల పెన్షన్లు, ఒక చేనేత కార్మికుల పెన్షన్, 258 వితంతు పెన్షన్లు ఉన్నాయి.గ్రామాల వారీగా పరిశీలిస్తే తాడిచెర్ల గ్రామానికి అత్యధికంగా 89 పెన్షన్లు మంజూరు కాగా, రుద్రారం గ్రామానికి 56, మల్లారం గ్రామానికి 51, పెద్దతూండ్ల గ్రామానికి 39 పెన్షన్లు కేటాయించారు. ఆన్‌సాన్‌పల్లి, చిన్నతూండ్ల గ్రామాలకు 19 చొప్పున, నాచారం, యడ్లపల్లి గ్రామాలకు 17 చొప్పున, కొయ్యూరు, వల్లెంకుంట గ్రామాలకు 16 చొప్పున, అడ్వాలపల్లికి 14, కొండంపేటకు 13, ఇప్పలపల్లికి 7, దుబ్బపేటకు 5, మల్లంపల్లికి 4 పెన్షన్లు మంజూరయ్యాయి.నూతనంగా పెన్షన్లు మంజూరు కావడంతో లబ్ధిదారుల్లో హర్షం వ్యక్తమవుతోంది. ఈ పెన్షన్ల ద్వారా అర్హులైన పేద కుటుంబాలకు ఆర్థికంగా కొంతమేర భరోసా లభించనుంది.