హైదరాబాద్‌లో ‘డిజిటల్ ఎమర్జెన్సీ కిట్’ ప్రారంభం దేశంలోనే తొలిసారిగా డిజిటల్ అత్యవసర కిట్‌ను పరిచయం చేసిన డీఈ-సీఐఎక్స్ ఇండియా

హైదరాబాద్ :  డిజిటల్ రంగంలో అంతరాయాలను సమర్థంగా ఎదుర్కొంటూ సంస్థల కార్యకలాపాలకు ఆటంకం కలగకుండా డిజిటల్ భద్రతను బలోపేతం చేసే లక్ష్యంతో డీఈ-సీఐఎక్స్ ఇండియా దేశంలోనే తొలిసారిగా ‘డిజిటల్ ఎమర్జెన్సీ కిట్‌’ను హైదరాబాద్‌లో పరిచయం చేసింది. ఐటీ సంస్థలు, గ్లోబల్ కెపాబిలిటీ సెంటర్లు (జీసీసీలు), సాస్, ఆర్టిఫిషియల్ ఇంటెలిజెన్స్ (ఏఐ), క్లౌడ్, డేటా సెంటర్లు, ఫిన్‌టెక్, టెలికాం, ఈ-కామర్స్ తదితర డిజిటల్ రంగ సంస్థలకు ఈ కార్యక్రమం ఉపయోగపడనుంది.

నెట్‌వర్క్ అంతరాయాలు, సైబర్ దాడులు, మౌలిక సదుపాయాల వైఫల్యాలు, మానవ తప్పిదాలు వంటి అనుకోని సమస్యలు ఎదురైనప్పుడు సంస్థలు తమ కార్యకలాపాలను కొనసాగించేందుకు ఈ కిట్ దోహదపడుతుంది. ముందస్తు ప్రణాళిక, ప్రత్యామ్నాయ కనెక్టివిటీ మార్గాలు, నెట్‌వర్క్ బ్యాకప్ వ్యవస్థలు, వ్యాపార కార్యకలాపాల నిరంతర కొనసాగింపునకు అవసరమైన చర్యలపై ఇందులో అవగాహన కల్పిస్తారు.
ఈ సందర్భంగా డీఈ-సీఐఎక్స్ ఇండియా స్ట్రాటజిక్ బిజినెస్ గ్రోత్ లీడర్ సుహైబ్ లాగ్డే మాట్లాడుతూ.. హైదరాబాద్ ఐటీ, గ్లోబల్ కెపాబిలిటీ సెంటర్లు, క్లౌడ్, డేటా సెంటర్లు, ఏఐ ఆధారిత వ్యాపారాలకు కీలక కేంద్రంగా ఎదిగిందన్నారు. సంస్థలు డిజిటల్ మౌలిక సదుపాయాలపై ఎక్కువగా ఆధారపడుతున్న నేపథ్యంలో కనెక్టివిటీ భద్రతను వ్యాపార నిరంతరాయ ప్రణాళికలో భాగంగా పరిగణించాలని సూచించారు. సమస్యలు తలెత్తిన తర్వాత పరిష్కారాల కోసం ప్రయత్నించడం కంటే, ముందుగానే ప్రత్యామ్నాయ కనెక్టివిటీ మార్గాలను ఏర్పాటు చేసుకోవడం, అంతరాయాలను ఎదుర్కొనేలా సన్నద్ధం కావడం అవసరమని పేర్కొన్నారు.

క్లౌడ్ అప్లికేషన్లు, ఏఐ సేవలు, డిజిటల్ చెల్లింపులు, సైబర్ భద్రత, డేటా సెంటర్ల నిర్వహణ వంటి రంగాల్లో నిరంతర ఇంటర్నెట్ కనెక్టివిటీ అత్యంత కీలకంగా మారిందని సంస్థ తెలిపింది. ఈ నేపథ్యంలో డిజిటల్ వ్యవస్థల్లోని లోపాలను ముందుగానే గుర్తించి, ప్రత్యామ్నాయ నెట్‌వర్క్ మార్గాలను ఏర్పాటు చేసుకోవడం ద్వారా సంస్థల డిజిటల్ సామర్థ్యాన్ని పెంపొందించవచ్చని వివరించింది.

ప్రస్తుతం డీఈ-సీఐఎక్స్ ఇండియా ముంబై, ఢిల్లీ, చెన్నై, కోల్‌కతా, హైదరాబాద్, బెంగళూరు నగరాల్లో ఇంటర్నెట్ ఎక్స్ఛేంజ్ కేంద్రాలను నిర్వహిస్తోంది. దేశీయంగా, అంతర్జాతీయంగా 630కి పైగా నెట్‌వర్క్‌లను అనుసంధానిస్తూ డిజిటల్ రంగానికి సేవలందిస్తోంది. డిజిటల్ మౌలిక సదుపాయాలను మరింత పటిష్టం చేయడమే ఈ కార్యక్రమం ప్రధాన ఉద్దేశమని సంస్థ వెల్లడించింది.