భర్త కళ్ళలో కారం చల్లి, చెట్టుకు కట్టేసి కొట్టి చంపిన భార్య..!!

- చనిపోయాడు అని తెలవగానే పోలీస్ స్టేషన్ వెళ్లి లొంగిపోయిన భార్య  

హుస్నాబాద్,  అక్టోబర్ (విజన్ ఆంధ్ర) :  సిద్దిపేట జిల్లా అక్కన్నపేట మండలం సేవాలాల్ మహరాజ్ తాండలో ఆదివారం రోజున జరిగిన హత్య స్థానికంగా కలకలం రేపింది. తాగి వచ్చి ఆస్తి కోసం గొడవకు దిగిన భర్త కళ్లల్లో కారం చల్లి, చెట్టుకు కట్టేసి కొట్టి చంపింది భార్య. వివరాల్లోకి వెళ్తే జనగామ జిల్లా నర్మెట మండలం మల్కపేటతాండాకు చెందిన 43 ఏళ్ల బానోత్ భగవాన్ కు అక్కన్నపేట మండలం సేవాలాల్ మహారాజ్ తాండాకు చెందిన మాలోతు రాజేశ్వరికి పదిహేనేళ్ల క్రితం వివాహమైంది. వీరిద్దరికీ ఇది రెండో పెళ్లి. రాజేశ్వరికి రెండో పెళ్లికి ముందే ఓ కూతురుంది. ఆ కూతురుకు తన మొదటి భర్త ఆస్తిలో భాగంగా హన్మకొండలో ఓ ఇల్లుంది. ఇక రాజేశ్వరీ, భగవాన్ ఇద్దరూ రెండో పెళ్లి చేసుకున్న తర్వాత.. వీరిద్దరికీ మరో కూతురు, కొడుకు జన్మించారు. అయితే, మొదటి భర్త ఆస్తిలో ముగ్గురికీ సమానం పంచాలని భగవాన్ పట్టుబట్టడంతో భార్యా, భర్తలైన రాజేశ్వరి, భగవాన్ మధ్య తరచూ గొడవలవుతున్నాయని తెలిసింది. ఈ క్రమంలో తల్లిగారింటికి వచ్చిన రాజేశ్వరి దగ్గరకు సేవాలాల్ మహారాజ్ తాండాకు తాగి వచ్చిన భగవాన్ మళ్లీ గొడవకు దిగాడని, దాంతో ఓపిక నశించిన భార్య రాజేశ్వరి కళ్లల్లో కారం చల్లి, చెట్టుకు కట్టేసి విపరీతంగా కొట్టి భర్తను చంపేసిందని, భర్త చనిపోయినట్టు అనుమానం రాగానే ఆమే నేరుగా వెళ్లి పోలీసులకు లొంగిపోయింది. వెంటనే హుస్నాబాద్ సీఐ శ్రీధర్, అక్కన్నపేట ఎస్సై ప్రశాంత్ సంఘటన స్థలానికి చేరుకొని విచారణ ప్రారంభించారు.  కేసు నమోదు చేసుకున్న పోలీసులు భగవాన్ మృతదేహాన్ని పోస్ట్ మార్టం కోసం హుస్నాబాద్ తరలించారు.