కమిషనర్‌కు షోకాజ్‌ నోటీసులు

సీపీ కార్యాలయం, కలెక్టరేట్‌ నుంచి వివరణ కోరుతూ నోటీసులు

బెల్లంపల్లి మంచిర్యాల జిల్లా : బెల్లంపల్లి మున్సిపల్‌ కమిషనర్‌ తన్నీరు రమేశ్‌కు ఉన్నతాధికారుల నుంచి షోకాజ్‌ నోటీసులు అందినట్లు తెలిసింది.  గత కొన్ని నెలల క్రితం మున్సిపల్‌ కౌన్సిల్‌ సమావేశంలో చోటుచేసుకున్న పరిణామాలతో పాటు సమావేశాల నిర్వహణపై ఇచ్చిన ఫిర్యాదులు ఇందుకు కారణంగా తెలుస్తోంది.  సెప్టెంబరు 23న మున్సిపల్‌ సమావేశ మందిరంలోకి గుర్తుతెలియని వ్యక్తి ప్రవేశించి ఫొటోలు, వీడియోలు చిత్రీకరించారని, చైర్‌పర్సన్‌ భర్త ఆమె చాంబర్‌లో కూర్చొని సీసీ కెమెరాల ద్వారా సమావేశాన్ని పర్యవేక్షించారని ఆరోపిస్తూ బీఆర్‌ఎస్‌కు చెందిన 14 మంది కౌన్సిలర్లు రామగుండం పోలీస్‌ కమిషనర్‌ అంబర్‌ కిషోర్‌ ఝాకు ఫిర్యాదు చేయడం, ఈ నేపథ్యంలో  షోకాజ్‌ నోటీసులు జారీ అయినట్లు సమాచారం. అక్టోబరు నెలలో మున్సిపల్‌ కౌన్సిల్‌ సమావేశం నిర్వహించలేదని కౌన్సిలర్లు కలెక్టర్‌ కుమార్‌ దీపక్‌కు మరో ఫిర్యాదు చేశారు. ఈ అంశంపై కలెక్టరేట్‌ నుంచి కూడా కమిషనర్‌కు నోటీసులు వచ్చినట్లు తెలిసింది. నోటీసుల విషయమై కమిషనర్‌ను వివరణ కోరగా, ఉన్నతాధికారుల నుంచి సమాధానం ఇవ్వాలని ఆదేశాలు వచ్చాయని, వాటికి వివరణ ఇస్తామని తెలిపారు. నోటీసుల ప్రతులు కోరగా సమాచార హక్కు చట్టం ద్వారా పొందాలని చెప్పడం విడ్డూరంగా ఉంది  మున్సిపల్‌ సమావేశ మందిరంలోకి మీడియాను అనుమతించని అధికారులు, గుర్తుతెలియని వ్యక్తి ఫొటోలు, వీడియోలు చిత్రీకరించడంపై అప్పట్లోనే ప్రశ్నలు తలెత్తాయి. తాజాగా వరుస ఫిర్యాదులు, నోటీసుల వ్యవహారం మున్సిపల్‌ వర్గాల్లో చర్చనీయాంశంగా మారింది.