రాజన్న ఆలయ అభివృద్ధి పనులకు గడువు విధించాలి

ఆలయ విస్తరణ పనులను సమీక్షించి, క్షేత్రస్థాయిలో పరిశీలించిన ప్రభుత్వ విప్ ఆది శ్రీనివాస్, దేవాదాయ శాఖ కమిషనర్ హనుమంతరావు , వేములవాడ శ్రీ రాజరాజేశ్వర స్వామి ఆలయ విస్తరణ, అభివృద్ధి పనులను నిర్దేశిత గడువులోగా పూర్తి చేయాలని ప్రభుత్వ విప్, వేములవాడ ఎమ్మెల్యే ఆది శ్రీనివాస్ అధికారులను ఆదేశించారు. పనుల వారీగా కాలపరిమితిని నిర్ణయించి, ప్రణాళికాబద్ధంగా ముందుకు సాగాలని సూచించారు. పనుల వేగం పెంచేందుకు అవసరమైన మేరకు కార్మికుల సంఖ్యను పెంచాలని స్పష్టం చేశారు. వేములవాడ టెంపుల్ ఏరియా డెవలప్‌మెంట్ అథారిటీ (వీటీఏడీఏ) ఆధ్వర్యంలో చేపడుతున్న రాజన్న ఆలయ విస్తరణ, అభివృద్ధి పనుల పురోగతిపై శనివారం భీమేశ్వర స్వామి ఆలయ గెస్ట్‌హౌస్‌లో సమీక్ష సమావేశం నిర్వహించారు. ప్రభుత్వ విప్ ఆది శ్రీనివాస్, దేవాదాయ శాఖ కమిషనర్ హనుమంతరావు, జిల్లా కలెక్టర్ గరిమ అగ్రవాల్, ఆర్‌అండ్‌బీ సీఈ రాజేశ్వర్‌రెడ్డి, ఆర్కిటెక్ట్, ధార్మిక సలహాదారుతో కలిసి ఇప్పటివరకు పూర్తయిన పనులు, ప్రస్తుత పురోగతిని సమీక్షించారు. అనంతరం అధికారులతో కలిసి ఆలయ విస్తరణ పనులను క్షేత్రస్థాయిలో పరిశీలించారు. నిర్మాణ పనుల పురోగతిని అడిగి తెలుసుకుని, పనుల వేగవంతానికి పలు సూచనలు చేశారు. ఈ సందర్భంగా ఆది శ్రీనివాస్ మాట్లాడుతూ ప్రభుత్వ లక్ష్యానికి అనుగుణంగా ఆలయ అభివృద్ధి పనులన్నీ నిర్ణీత ప్రణాళిక ప్రకారం పూర్తి చేయాలని స్పష్టం చేశారు. ప్రతి పనికి ప్రత్యేక గడువు విధించి, నిరంతర పర్యవేక్షణతో ముందుకు సాగాలని సూచించారు. నిర్మాణ పనులకు అనుగుణంగా కార్మికుల సంఖ్యను పెంచి, ఎక్కడా జాప్యం లేకుండా చర్యలు తీసుకోవాలని ఆదేశించారు. ఈ సమావేశంలో ధార్మిక సలహాదారు గోవింద హరి, ఆలయ ఈఓ రమాదేవి, ఆర్డీఓ కేఎస్‌బీ కుమారి, ఆర్‌అండ్‌బీ ఈఈ భీమ్లానాయక్, స్థపతులు జయేంద్రన్, గణేష్, స్ట్రక్చర్ ఇంజనీర్ శ్రీధర్‌రెడ్డి, తహసీల్దార్ జయంత్ తదితరులు పాల్గొన్నారు.