వర్షానికి రోడ్డుపైకి వచ్చిన కొండచిలువ.

చౌటకూర్, : సంగారెడ్డి జిల్లా చౌటకూర్ మండలం పరిధిలోని చక్రియాల గ్రామంలో మంగళవారం రాత్రి కురిసిన భారీ వర్షం అనంతరం అరుదైన ఘటన చోటుచేసుకుంది. పంట పొలాల నుంచి బయటకు వచ్చిన ఓ పెద్ద కొండచిలువ గ్రామ సమీపంలోని రహదారిని దాటుతూ కనిపించడంతో అక్కడి ప్రజలు ఒక్కసారిగా అప్రమత్తమయ్యారు.ఆ సమయంలో శివంపేట నుంచి చక్రియాల గ్రామానికి వస్తున్న వాహనదారులు తమ వాహనాలను నిలిపివేసి కొండచిలువను ఆసక్తిగా వీక్షించారు. పలువురు తమ మొబైల్ ఫోన్లలో వీడియోలు చిత్రీకరించి సామాజిక మాధ్యమాల్లో పంచుకోవడంతో అవి వైరల్‌గా మారాయి.ఈ ఘటనతో కొంతసేపు రహదారిపై రాకపోకలకు అంతరాయం ఏర్పడింది. అనంతరం కొండచిలువ సమీపంలోని పొదల్లోకి వెళ్లిపోవడంతో పరిస్థితి సాధారణ స్థితికి చేరుకుంది. ఈ సందర్భంగా గ్రామస్తులు మాట్లాడుతూ, వర్షాకాలంలో పాములు, కొండచిలువలు వంటి అడవి జీవులు నీటి ప్రవాహాల కారణంగా రహదారులపైకి వచ్చే అవకాశం ఉంటుందని తెలిపారు. ముఖ్యంగా రాత్రి సమయంలో ప్రయాణించే వాహనదారులు అప్రమత్తంగా ఉండాలని, వేగాన్ని తగ్గించి జాగ్రత్తగా వాహనాలు నడపాలని సూచించారు. ఇలాంటి పరిస్థితులు ఎదురైతే వాహనాలను సురక్షితంగా నిలిపి, వాటిని రెచ్చగొట్టకుండా సంబంధిత అటవీశాఖ అధికారులకు సమాచారం అందించాలని గ్రామస్తులు విజ్ఞప్తి చేశారు