తాడాన్‌పల్లిలో కుళ్లిపోయిన కోడిగుడ్ల పంపిణీ

చౌటకూర్ : గర్భిణీలు, బాలింతలు, చిన్నారులకు పౌష్టికాహారం అందించేందుకు ప్రభుత్వం అమలు చేస్తున్న పథకాల ద్వారా పంపిణీ చేస్తున్న కోడిగుడ్ల నాణ్యతపై చౌటకూర్ మండలంలోని తాడాన్‌పల్లి గ్రామంలో లబ్ధిదారులు ఆందోళన వ్యక్తం చేశారు. చౌటకూర్ మండల పరిధిలోని తాడాన్‌పల్లి గ్రామంలోని అంగన్వాడీ కేంద్రంలో శనివారం పంపిణీ చేసిన కొన్ని కోడిగుడ్లు కుళ్లిపోయి ఉన్నాయని లబ్ధిదారులు ఆరోపించారు.ప్రభుత్వం అంగన్వాడీ కేంద్రాల ద్వారా గర్భిణీలు, బాలింతలు, చిన్నారులకు పౌష్టికాహారం అందించేందుకు బాలామృతం తదితర పోషకాహార కార్యక్రమాలను అమలు చేస్తోంది. ఇందులో భాగంగా అంగన్వాడీ కేంద్రాలకు సంబంధిత ఏజెన్సీల ద్వారా కోడిగుడ్లను సరఫరా చేసి లబ్ధిదారులకు పంపిణీ చేస్తున్నారు.అయితే తాడాన్‌పల్లి అంగన్వాడీ కేంద్రంలో పంపిణీ చేసిన కోడిగుడ్లను ఇంటికి తీసుకెళ్లిన కొందరు లబ్ధిదారులు వాటి నాణ్యతపై అనుమానం వ్యక్తం చేశారు. గుడ్లను నీటిలో వేసి పరిశీలించగా కొన్ని గుడ్లు నీటిపైకి తేలాయని వారు తెలిపారు. దీంతో అనుమానం వచ్చి గుడ్లను పగలగొట్టి చూడగా వాటి నుంచి దుర్వాసన రావడంతో పాటు అవి కుళ్లిపోయిన స్థితిలో ఉన్నట్లు గుర్తించామని లబ్ధిదారులు పేర్కొన్నారు.కుళ్లిపోయిన గుడ్లకు సంబంధించిన ఫొటోలు, వీడియోలను లబ్ధిదారులు తీసి తమ వద్ద భద్రపరుచుకున్నారు. గర్భిణీలు, బాలింతలు, చిన్నారుల కోసం ప్రభుత్వం అందిస్తున్న పౌష్టికాహారంలో నాణ్యతా ప్రమాణాలు పాటించాల్సిన అవసరం ఉందని వారు పేర్కొన్నారు. ఇలాంటి గుడ్లను వినియోగించడం వల్ల చిన్నారులు, గర్భిణీలు, బాలింతలు అనారోగ్యానికి గురయ్యే అవకాశం ఉందని ఆందోళన వ్యక్తం చేశారు.అంగన్వాడీ కేంద్రాలకు గుడ్లను సరఫరా చేసే ఏజెన్సీలు నాణ్యత లేని గుడ్లను సరఫరా చేస్తున్నాయా? లేక అంగన్వాడీ కేంద్రాల్లో గుడ్లను సరైన పద్ధతిలో నిల్వ చేయకపోవడం వల్ల అవి పాడవుతున్నాయా? అనే విషయాలపై సంబంధిత అధికారులు సమగ్రంగా విచారణ చేపట్టాలని లబ్ధిదారులు కోరుతున్నారు.అంగన్వాడీ కేంద్రాలకు సరఫరా అవుతున్న కోడిగుడ్ల నాణ్యత, నిల్వ విధానం, పంపిణీ ప్రక్రియపై అధికారులు తనిఖీలు నిర్వహించాలని వారు డిమాండ్ చేశారు. కుళ్లిపోయిన గుడ్లు పంపిణీ అయినట్లు నిర్ధారణ అయితే బాధ్యులపై తగిన చర్యలు తీసుకోవాలని కోరారు. ఇకపై అంగన్వాడీ కేంద్రాల ద్వారా నాణ్యమైన, సురక్షితమైన కోడిగుడ్లనే లబ్ధిదారులకు పంపిణీ చేయాలని తాడాన్‌పల్లి గ్రామస్తులు, లబ్ధిదారులు సంబంధిత అధికారులను కోరుతున్నారు.