ఉత్తమ ఉపాధ్యాయులకు ఘన సన్మానం.. పుల్కల్ మండలంలో అట్టహాసంగా సత్కార కార్యక్రమం!

చౌటకూర్ : పుల్కల్ మండలంలో విద్యారంగ అభివృద్ధికి విశేష కృషి చేస్తూ, విద్యార్థుల భవిష్యత్తును తీర్చిదిద్దడంలో అంకితభావంతో సేవలందిస్తున్న ఉత్తమ ఉపాధ్యాయులను ఘనంగా సన్మానించారు. మండల విద్యాధికారి శంకర్ ఆధ్వర్యంలో స్థానిక ఎంపీడీవో కార్యాలయంలో ఈ ప్రత్యేక సత్కార కార్యక్రమం నిర్వహించారు. ఈ సందర్భంగా ఉత్తమ ఉపాధ్యాయులుగా ఎంపికైన వారిని శాలువాలు, పూలమాలలు, పుష్పగుచ్ఛాలతో ఘనంగా సత్కరించి అభినందనలు తెలిపారు. అనంతరం వక్తలు మాట్లాడుతూ.. విద్యార్థులకు నాణ్యమైన విద్యను అందించడంతో పాటు వారిలో క్రమశిక్షణ, నైతిక విలువలు, సామాజిక బాధ్యతలను పెంపొందించడంలో ఉపాధ్యాయుల పాత్ర అత్యంత కీలకమని కొనియాడారు.ఉపాధ్యాయ వృత్తి కేవలం ఉద్యోగం మాత్రమే కాదని, ఉత్తమ సమాజ నిర్మాణానికి పునాది వేసే పవిత్రమైన బాధ్యత అని పేర్కొన్నారు. విద్యార్థుల్లో దాగి ఉన్న ప్రతిభను వెలికితీసి, వారిని ఉన్నత శిఖరాలకు చేర్చడంలో ఉపాధ్యాయుల కృషి వెలకట్టలేనిదని ప్రశంసించారు.విశిష్ట సేవలందించే ఉపాధ్యాయులను గుర్తించి సత్కరించడం ద్వారా ఇతరులకు కూడా ఎంతో స్ఫూర్తి, ప్రోత్సాహం లభిస్తాయని స్పష్టం చేశారు. ఈ గుర్తింపు ఉపాధ్యాయుల్లో సరికొత్త ఉత్సాహాన్ని నింపిందని, భవిష్యత్తులోనూ ఇదే అంకితభావంతో విద్యాభివృద్ధికి కృషి చేయాలని ఆకాంక్షించారు.ఈ కార్యక్రమంలో మండల విద్యాధికారి శంకర్, వివిధ పాఠశాలల ప్రధానోపాధ్యాయులు, ఉపాధ్యాయ సంఘాల నాయకులు, ఉపాధ్యాయులు, ఎంఆర్‌సీ సిబ్బంది తదితరులు పెద్ద సంఖ్యలో పాల్గొన్నారు.