అర్హులైన ప్రతి ఒక్కరికీ చేయూత - ఆదిలాబాద్ లో ఘనంగా పెన్షన్ల పంపిణీ.

*ఆదిలాబాద్ బ్యూరో  : ఆదిలాబాద్ మండల పరిషత్ అభివృద్ధి అధికారి (ఎంపిడివో) కార్యాలయంలో 'చేయూత' పెన్షన్ల పంపిణీ కార్యక్రమం బుధవారం ఘనంగా, సంతోష వాతావరణంలో జరిగింది. ఈ కార్యక్రమానికి ముఖ్య అతిథులుగా ఆదిలాబాద్ ఎమ్మెల్యే పాయల్ శంకర్, ఆదిలాబాద్ మార్కెట్ కమిటీ చైర్మన్ బోరంచు శ్రీకాంత్ రెడ్డి హాజరయ్యారు. ముందుగా లబ్ధిదారులకు నూతన పింఛన్ మంజూరు పత్రాలను, పెన్షన్ కార్డులను చేతుల మీదుగా అందజేశారు. పెన్షన్ అందుకున్న వృద్ధులు, వితంతువులు, దివ్యాంగుల ముఖాల్లో ఆనందం వెల్లివిరిసింది. పలువురు లబ్ధిదారులు ఎమ్మెల్యేకు, చైర్మన్ కు కృతజ్ఞతలు తెలిపారు. పేదల సంక్షేమమే ప్రభుత్వ ధ్యేయం: ఎమ్మెల్యే ఈ సందర్భంగా ఎమ్మెల్యే పాయల్ శంకర్ మాట్లాడుతూ, పేదలు, వృద్ధులు, వితంతువులు, ఒంటరి మహిళలు, దివ్యాంగుల సంక్షేమం కోసమే ప్రభుత్వం చేయూత పథకాన్ని అమలు చేస్తోందన్నారు. అర్హత ఉన్న ప్రతి ఒక్కరికీ పింఛన్ అందేలా చూస్తామని, ఎవరూ మధ్యవర్తులను ఆశ్రయించాల్సిన అవసరం లేదని స్పష్టం చేశారు. ప్రభుత్వం అందిస్తున్న ప్రతి రూపాయి నేరుగా లబ్ధిదారుల ఖాతాల్లోకే చేరుతుందన్నారు. ప్రభుత్వ పథకాలను సద్వినియోగం చేసుకోండి: శ్రీకాంత్ రెడ్డి మార్కెట్ కమిటీ చైర్మన్ బోరంచు శ్రీకాంత్ రెడ్డి గారు మాట్లాడుతూ, ప్రభుత్వం ప్రవేశపెడుతున్న సంక్షేమ పథకాలను ప్రజలు పూర్తిగా సద్వినియోగం చేసుకోవాలని కోరారు. పింఛన్లతో పాటు రేషన్, ఆరోగ్య శ్రీ, ఇతర సంక్షేమ పథకాల గురించి అవగాహన కల్పించారు. మండలంలో అర్హులైన వారు ఎవరైనా మిగిలి ఉంటే వెంటనే దరఖాస్తు చేసుకోవాలని, వారికి అండగా ఉంటామని హామీ ఇచ్చారు. ఈ కార్యక్రమంలో డీఆర్‌డీఓ పీడీ రాథోడ్ రవీందర్, డీపీఓ జి. రమేష్, ఎంపీడీఓ వంశీ కృష్ణ , ఎంపీఓ ఆనంద్, పాల్గొన్నారు. వారితో పాటు స్థానిక సర్పంచ్‌లు, ఉప సర్పంచ్‌లు, గ్రామ పంచాయతీ కార్యదర్శులు, వార్డు సభ్యులు, లబ్ధిదారులు పెద్ద సంఖ్యలో పాల్గొన్నారు. అధికారులు పెన్షన్ల పంపిణీ విధానం, కొత్తగా దరఖాస్తు చేసుకునే పద్ధతి, కావాల్సిన పత్రాల గురించి లబ్ధిదారులకు వివరించారు. కార్యక్రమం ముగిసే వరకు లబ్ధిదారుల సందేహాలను నివృత్తి చేశారు.