పశువుల ఆరోగ్య పరిరక్షణకు ఉచిత వెటర్నరీ వైద్య శిబిరం

సంగారెడ్డి జిల్లా గడ్డపోతారం, :  సంగారెడ్డి జిల్లా గడ్డపోతారం మున్సిపాలిటీ పరిధిలోని లక్ష్మీపతిగూడెం 17వ వార్డులో కౌన్సిలర్ కుమ్మరి కృష్ణ ఆధ్వర్యంలో శ్రీ సత్యసాయి బాబా ట్రస్ట్ సహకారంతో పశువులకు ఉచిత వెటర్నరీ వైద్య సేవా శిబిరాన్ని నిర్వహించారు. ఈ శిబిరానికి పశువైద్యులు హాజరై గ్రామంలోని రైతులు, పశుపోషకులకు అవసరమైన వైద్య సేవలను అందించారు. గ్రామీణ ప్రాంతాల్లో వ్యవసాయంతో పాటు పశుపోషణపై ఆధారపడి జీవనం సాగిస్తున్న రైతులకు పశువుల ఆరోగ్య పరిరక్షణ ఎంతో ముఖ్యమనే ఉద్దేశంతో ఈ ఉచిత వైద్య శిబిరాన్ని ఏర్పాటు చేశారు. ఈ సందర్భంగా గ్రామంలోని రైతులు తమ గేదెలు, ఆవులు, గొర్రెలు తదితర పశువులను శిబిరానికి తీసుకువచ్చి వైద్య పరీక్షలు చేయించుకున్నారు. పశువైద్యులు పశువులను క్షుణ్ణంగా పరిశీలించి, వాటికి వచ్చే వ్యాధులు, ఆరోగ్య సమస్యలపై రైతులకు అవగాహన కల్పించారు. ముఖ్యంగా పశువుల్లో నట్టల నివారణకు అవసరమైన మందులను ఉచితంగా పంపిణీ చేశారు. అలాగే సూడి గేదెలను పరీక్షించి, వాటి ఆరోగ్య పరిస్థితిని పరిశీలించారు. అవసరమైన పశువులకు మెరుగైన మందులు అందజేసి, పశువుల సంరక్షణ, పోషణ, వ్యాధుల నివారణకు తీసుకోవాల్సిన జాగ్రత్తలను రైతులకు వివరించారు. ఈ సందర్భంగా మున్సిపల్ కౌన్సిలర్ కుమ్మరి కృష్ణ మాట్లాడుతూ.. పశువులు ఆరోగ్యంగా ఉంటేనే రైతుల కుటుంబాలకు ఆర్థిక భరోసా లభిస్తుందని తెలిపారు. పశుపోషకులకు మెరుగైన వైద్య సేవలు అందుబాటులో ఉండాలనే ఉద్దేశంతో ఇలాంటి ఉచిత వైద్య శిబిరాలు నిర్వహించడం ఎంతో ఉపయోగకరమన్నారు. గ్రామీణ ప్రాంత రైతులకు, పశుపోషకులకు అవసరమైన సహాయ సహకారాలు అందించేందుకు తాను ఎల్లప్పుడూ కృషి చేస్తానని పేర్కొన్నారు. సేవా కార్యక్రమాల ద్వారా ప్రజలకు అండగా నిలవడం తన బాధ్యతగా భావిస్తున్నానని తెలిపారు. ఈ కార్యక్రమంలో పశువైద్యులు, శ్రీ సత్యసాయి బాబా ట్రస్ట్ సభ్యులు, గ్రామ పెద్దలు భవాని డా. నలగండ్ల అశోక్ కుమార్ పటేల్, అంబటి అంతయ్య, దుంపల శంకరయ్య, ఎం.డి. పాషా, భౌరంపేట మురళి తదితరులతో పాటు పలువురు గ్రామస్తులు, రైతులు పాల్గొన్నారు. పశువుల ఆరోగ్య పరిరక్షణకు ఉచితంగా వైద్య సేవలు అందించిన శ్రీ సత్యసాయి బాబా ట్రస్ట్ బృందానికి, సహకరించిన వార్డు కౌన్సిలర్ కుమ్మరి కృష్ణకు రైతులు కృతజ్ఞతలు తెలిపారు.