అథ్లెటిక్స్‌లో అదరగొట్టిన రామవరం ప్రభుత్వ పాఠశాల విద్యార్థిని!

 జాతీయస్థాయి పోటీలకు హర్షిక ఎంపిక

కొత్తగూడెం బ్యూరో : ప్రభుత్వ పాఠశాలల్లోనూ ప్రతిభకు కొదవలేదని నిరూపిస్తూ రామవరం ప్రభుత్వ ఉన్నత పాఠశాలకు చెందిన 8వ తరగతి విద్యార్థిని జె. హర్షిక అథ్లెటిక్స్‌లో అద్భుత ప్రతిభ కనబరిచింది. రాష్ట్రస్థాయి పోటీల్లో ద్వితీయ స్థానం సాధించి జాతీయస్థాయి పోటీలకు ఎంపికై పాఠశాలతో పాటు రామవరం గ్రామానికి కీర్తిప్రతిష్ఠలు తీసుకొచ్చింది.చిన్న వయస్సులోనే క్రీడలపై ఆసక్తి పెంచుకుని, పట్టుదలతో నిరంతరం సాధన చేసిన హర్షిక రాష్ట్రస్థాయిలో సత్తాచాటడం అభినందనీయమని పలువురు ప్రశంసిస్తున్నారు. సరైన ప్రోత్సాహం, కృషి ఉంటే ప్రభుత్వ పాఠశాలల విద్యార్థులు సైతం జాతీయస్థాయిలో రాణించగలరనే విషయాన్ని ఆమె విజయం మరోసారి చాటిచెప్పింది. హర్షిక సాధించిన ఘనతను పురస్కరించుకుని పాఠశాలలో ప్రత్యేక అభినందన కార్యక్రమం నిర్వహించారు. ఈ సందర్భంగా ఉపాధ్యాయులు, పాఠశాల సిబ్బంది ఆమెను ఘనంగా సత్కరించి అభినందించారు. విద్యార్థిని విజయం వెనుక కృషి చేసిన వ్యాయామ విద్యా ఉపాధ్యాయురాలు ధర్మమ్మను కూడా ప్రత్యేకంగా అభినందించారు. ఈ సందర్భంగా పాఠశాల ప్రధానోపాధ్యాయులు భరత్ మాట్లాడుతూ.. విద్యార్థులు చదువుతోపాటు క్రీడలపైనా ఆసక్తి పెంచుకుని అన్ని రంగాల్లో రాణించాలని సూచించారు. హర్షిక సాధించిన విజయం పాఠశాలలోని ఇతర విద్యార్థులకు స్ఫూర్తిగా నిలుస్తుందని పేర్కొన్నారు. జాతీయస్థాయి పోటీల్లోనూ ఇదే పట్టుదలతో ప్రతిభ కనబరిచి పాఠశాలకు, జిల్లాకు మరింత మంచి పేరు తీసుకురావాలని ఆకాంక్షించారు. ఒక ప్రభుత్వ పాఠశాల విద్యార్థిని సాధించిన ఈ విజయం మరెందరో విద్యార్థుల్లో క్రీడాస్ఫూర్తిని నింపుతోంది. హర్షిక అడుగులు రాష్ట్రస్థాయి నుంచి జాతీయస్థాయికి.. అక్కడి నుంచి అంతర్జాతీయ వేదికల వరకు సాగాలని రామవరం గ్రామస్థులు ఆకాంక్షిస్తున్నారు.