నాగర్‌కర్నూల్ ఇరిగేషన్ ఆఫీస్‌లో ఏసీబీ సోదాలు

నాగర్‌కర్నూల్ : నాగర్‌కర్నూల్ జిల్లా కేంద్రంలోని ఇరిగేషన్ కార్యాలయంలో గురువారం అవినీతి నిరోధక శాఖ (ఏసీబీ) అధికారులు సోదాలు నిర్వహించారు. జిల్లా కేంద్రంలోని ఇరిగేషన్ డిప్యూటీ ఎగ్జిక్యూటివ్ ఇంజనీర్ (డీఈఈ) సత్యనారాయణ గౌడ్ కార్యాలయంలో ఏసీబీ అధికారులు తనిఖీలు చేపట్టారు. ఉదయం నుంచే ఏసీబీ అధికారుల బృందం ఇరిగేషన్ ఆఫీస్‌కు చేరుకుని తనిఖీలు ప్రారంభించింది. కార్యాలయంలోని ఫైళ్లు, రికార్డులు, బిల్లులు, టెండర్లకు సంబంధించిన పత్రాలను క్షుణ్ణంగా పరిశీలించారు. సిబ్బందిని విడివిడిగా విచారించి వివరాలు సేకరించారు.అదే సమయంలో హైదరాబాద్‌లోని ఆయన నివాసంలో కూడా ఏసీబీ అధికారులు తనిఖీలు కొనసాగించారు. ఆస్తులకు సంబంధించిన పత్రాలు, బ్యాంకు ఖాతాలు, ఇతర ఆర్థిక లావాదేవీల వివరాలను పరిశీలిస్తున్నట్లు సమాచారం.ఏసీబీ సోదాల నేపథ్యంలో ఇరిగేషన్ కార్యాలయం వద్ద ఉద్రిక్త వాతావరణం నెలకొంది. సోదాల వివరాలను అధికారులు అధికారికంగా వెల్లడించలేదు. తనిఖీలు పూర్తయిన తర్వాత పూర్తి వివరాలు వెల్లడించే అవకాశం ఉందని ఏసీబీ వర్గాలు తెలిపాయి. సోదాలకు గల కారణాలపై ఇంకా స్పష్టత రాలేదు. అక్రమాస్తులు లేదా అవినీతి ఆరోపణల నేపథ్యంలో ఈ సోదాలు జరిగి ఉండవచ్చని ప్రచారం జరుగుతోంది. ఈ ఘటన జిల్లాలో చర్చనీయాంశంగా మారింది.